Şəmkirdə qanunsuz odlu silah saxlayanlar tutulublar

Qanunsuz saxlanılan silah-sursatın aşkarlanaraq götürülməsi və gələcəkdə baş verə biləcək cinayətlərin qarşısının alınması istiqamətində Şəmkir Rayon Polis Şöbəsinin əməkdaşları tərəfindən tədbirlər davam etdirilir.

Daxili İşlər Nazirliyinin mətbuat xidmətinin Gəncə regional qrupundan  Polise.az -a verilən məlumata görə, daxil olan məlumat əsasında şöbə əməkdaşlarının keçirdikləri əməliyyat-axtarış tədbirləri nəticəsində qanunsuz olaraq odlu silah əldə edib saxlamaqda və gəzdirməkdə şübhəli bilinən, rayon sakini, əvvəllər məhkum olunmuş Ramil Sadıqov saxlanılaraq polis şöbəsinə gətirilib. Onun üzərinə baxış keçirilən zaman bir ədəd atəşə yararlı “Makarov” markalı tapança, həmin silaha aid 6 ədəd atəşə yararlı 9 millimetrlik patron və bir ədəd sandıqca aşkar edilərək götürülüb.

Polis əməkdaşlarının keçirdikləri digər bir əməliyyat-axtarış tədbirləri nəticəsində qanunsuz olaraq narkotik vasitə əldə edib saxlamaqda şübhəli bilinən rayon sakini Vüqar Qasımov saxlanılıb. Üzərində “heroin” aşkar edilən şübhəli şəxsin yaşadığı evdən bir ədəd atəşə yararlı “Makarov” tapançası və dörd ədəd patron aşkar edilərək götürülüb.

Bundan başqa şöbə əməkdaşlarının keçirdikləri ayrı-ayrı əməliyyat-axtarış, profilaktiki tədbirlər nəticəsində rayon sakinlərinə məxsus 8 ədəd, müvafiq sənədləri olmayan müxtəlif marka və kalibirli ov tüfəngləri də aşkar edilərək götürüb. Qeyd edək ki, polis əməkdaşlarının keçirdikləri silsilə tədbirlər nəticəsində cari ilin müvafiq dövründə ümumilikdə 27 ədəd qanunsuz saxlanılan odlu silah müsadirə olunub.

Götürülən maddi sübutlar müvafiq ekspertizaya təqdim edilib, faktlarla bağlı araşdırmalar davam etdirilir.

Polise.az