“Ağıllı ol, Molla… Azərbaycan 90-larda sərhədi necə keçdiyinizi unutmayıb” – Türkiyəli yazar İranı tarixi fakt qarşısında qoydu

İranın dini tədbirlərində Azərbaycan Prezidenti İlham Əliyevə və Türkiyə Prezidenti Rəcəb Tayyib Ərdoğana qarşı təhqirlərin səsləndirilməsi ilə bağlı məlumatlar vermişdik.

Bir daha yada salaq ki, Ərdəbilin baş mollası Həsən Amulinin təşkil etdiyi “Müqavimət şəhidləri və Çaldıran mərasimi” adlı tədbirdə Azərbaycan və Türkiyənin dövlət başçılarının əleyhinə şər-böhtan, qərəz və nifrət dolu sözlər söylənilib, hər iki dövlətin ünvanına iftiralar səsləndirilib. Buna Azərbaycan tərəfi və yerli media bütün səviyyələrdə etirazını, cavabını bildirib.

İranın bu cür addımına qarşı etirazlar Türkiyədən də gəlməkdədir.

“Milliyet” qəzetinin yazarı Tunca Bengin “Akıllı ol molla” adlı yazısında bildirir ki, ali dini lider Xamneyiyə yaxın olan ədəbsiz mollanın Türkiyə prezidenti Ərdoğana və azərbaycanlı həmkarı İlham Əliyevə böhtan atması İranın “şeytan siması”nın daha bir bariz təzahürüdür.

Müəllif yazır ki, Əsədin devrilməsi ilə Suriyadakı qazanclarını itirən İranın tamamilə şüursuz olduğu göz qabağındadır. Onun sözlərinə görə, 1979-cu il İslam İnqilabından bu yana ən çətin günlərini yaşayan Tehran rejimi daxildə xalq etirazları ilə üzləşir, xaricdə isə diplomatik məğlubiyyətlərə və zərbələrə məruz qalır. Buna baxmayaraq, İran hələ də qonşularına və digər ölkələrə qarşı qeyri-sabitlik yaratmaq və təxribat törətmək siyasətindən əl çəkmir:

Suriyadakı məğlubiyyət, İranın böyük bir öfkə, çaşqınlıq və məyusluq içində olmasına səbəb olub. Bu vəziyyət, onun həzm edə bilmədiyi uğursuzluqları təxribatçı davranışlarla kompensasiya etməyə çalışmasına gətirib çıxarır. Tehran rejimi xaos yaratmaq, qarışıqlığı alovlandırmaq və bölgədə yeni gərginliklər törətmək üçün nə etdiyini düşünmədən addımlar atır. Bu siyasət isə artıq təhlükəli bir dəlilik səviyyəsinə çatıb.

Daxildəki narazılıqları həll etmək və xalqın rifahını yaxşılaşdırmaq əvəzinə İran rejimi öz köhnə vərdişlərindən əl çəkmir. Bu isə onun həm ölkə daxilində, həm də regionda daha böyük izolyasiyaya məruz qalmasına səbəb olur”.

Tunca Bengin qeyd edir ki, İranla PKK arasında hər zaman təmas olub. PKK məsələsi həll olunmayıbsa, bunun arxasında İranın ikiüzlü siyasəti dayanır:

“Qəndilin bir tərəfi İraqda, digər tərəfi İrandadır. İran terrora qarşı Türkiyə ilə əməkdaşlıq etsəydi, PKK problemi olmazdı. Amma CIA, MOSSAD və MI6 kimi İran kəşfiyyat təşkilatı SAVAMA-nın da terror təşkilatının tanınmış adları Murat Karayılan, Cəmil Bayık və Duran Kalkanla əlaqələri var və onlar hər zaman terror liderlərini qoruyublar.

Həqiqətən də Türkiyə 2011-ci ildə terror təşkilatı liderlərinin, xüsusilə Murat Karayılanın Qəndildə sığındığı ərazilərin koordinatlarını İrana vermişdi. Qəndilin İran hissəsindəki 20 nöqtəyə qarşı təcili əməliyyat keçirilməsi tələb olunub. Bu nöqtələrdən ikisinin Murat Karayılanın mütəmadi olaraq istifadə etdiyi ərazilər olduğu müəyyən edilib.

Buna baxmayaraq, İran təhlükəsizlik qüvvələri lazımi həssaslıq göstərməyib və Karayılandakı yerlərini tərk ediblər. İndi həmin terrorçu liderlər çox güman ki, Qəndilin İran hissəsindədir…”

Müəllif bir həqiqəti də diqqətə çatdırır: Qarabağ müharibəsində İran torpaqlarını azad edən Azərbaycanı deyil, işğalçı Ermənistanı dəstəkləyib.

“Bu alçaqlığın keçmişi var. Sovet İttifaqı dağıldıqdan sonra 1991-ci il oktyabrın 18-də ikinci dəfə müstəqilliyini elan edən Azərbaycana İranın münasibəti də həmin illərdə düşmənçilik xarakteri daşıyırdı. İlk gündən İran İslam İnqilabını yaymaq məqsədi ilə Azərbaycanın müxtəlif bölgələrində təsirli fəaliyyətlər həyata keçirdilər və bu fəaliyyətlər xüsusilə Azərbaycanın İran sərhədinə yaxın olan cənub bölgələrində göründü.

Ermənistanın 1992-ci ilin fevralında Xocalı qətliamından başlayaraq Qarabağı işğal etmək planı ilə başlayan çirkin əməllərini davam etdirdiyi bir vaxtda, vəziyyətdən istifadə edərək Azərbaycan sərhədində təlimlər keçirən İran, Azərbaycan ərazisinin 10-20 kilometr dərinliyinə girdi və  nəzarət altına aldığı ərazidə öz bayrağını dalğalandırdı.

Biz də jurnalistlər olaraq Rusiya və İranın təkzib etdiyi bu təcavüzü gedib gördük və MİLLİYET qəzetinin 4 sentyabr 1993-cü il sayında fotoşəkillərlə tarixə yazdıq.

Bu, həqiqətən də çox çətin və əziyyətli bir dövr idi. Qafqaz barıt çəlləyinə bənzəyirdi. İran qoşunları Azərbaycan ərazisində 20 kilometrlik ərazini  nəzarətə götürmüşdü. İranın Azərbaycana təcavüzü Ankarada şok effekti yaratmışdı.. Türkiyə döyüş təyyarələri bölgədə kəşfiyyat uçuşları həyata keçirirdi.  Xarici İşlər Nazirliyi ard-arda görüşlər keçirirdi…

İran heç vaxt etibarlı dost olmayıb. Həmişə ikiüzlü olub  və kiminsə kürəyindən bıçaq vurmaq üçün fürsət gözləyib”.

Türkiyəli yazar bildirir ki, İranın etdiyi hər şey həm Türkiyənin, həm də Azərbaycanın yaddaşına həkk olunub. Ona görə də İran baxımından onların etdiklərini odla oynamaq da adlandırmaq olar:

“Bildiyiniz kimi, İran əhalisinin yarısı türkdür və onların İranın Türkiyə və Azərbaycana qarşı düşmən mövqeyinə nə qədər sərt reaksiya verdiyi göz qabağındadır.

Bu yaxınlarda həddini bilməyən həmin mollanın olduğu şəhərin küçə və prospektləri Türkiyə prezidenti Ərdoğan və Azərbaycan prezidenti Əliyevin posterləri ilə bəzədilmişdi… Əgər bunun əksi olsaydı, kim bilir İran nə edərdi?

Düşün və ağıllı ol, Molla…”

Polise.az