Azərbaycan necə etməlidir ki, Qarabağa yenidən terrorçular gəlməsin? – Ekspert

“Ermənistan Qarabağda yaşayan və Azərbaycan vətəndaşı olan ermənilərin təhlükəsizliyinin qarantı ola bilməz. Müvəqqəti olaraq bu funksiya Rusiya Federasiyasının sülhməramlı qüvvələrinə etibar edilib. Ermənistan ordusunun oradan çıxarılması gözlədiyimizdən aşağı tempdə və vizual görüntülər olmadan, davam edir. Artıq Ermənistan Qarabağa çağırışçı göndərmir və ya göndərə bilmir, Ermənistana məzuniyyətə gələnlər də oraya qaytarılmır. Vitali Balasanyanın verdiyi bəyanat isə onun Azərbaycan məhkəməsi qarşısında mümkün qədər tez çıxarılmasını şərtləndirir”.

Bu fikirləri hərbi ekspert Ədalət Verdiyev bildirib. Onun sözlərinə görə, Ermənistan vətəndaşlarının Qarabağda “könüllü” olaraq xidmət etməsi barədə səslənən fikirlərə iəsmi səviyyədə münasibət bildirilməlidir:

“Yəni Ermənistandan gəlməyə can atan “könüllülərin” diqqətinə çatdırılmalıdır ki, onlar da əvvəl Xocavənd və Hadrut istiqamətinə Şirakdan gələn erməni silahlıları kimi, “Azərbaycan ərazisinə soxulan terrorçu” kimi mühakimə olunacaq. 4 ay əvvəl saxlanılan erməni terrorçularından heç olmasa bir neçəsini məhkəmə qarşısına çıxarmaq vacibdir.  Onların mümkün qədər qısa müddət ərzində mühakimə olunması isə bu erməni “könüllülərin” sıralarında ciddi seyrəlməyə gətirib çıxara bilər” – deyə eksper əlavə edib.