“Bir liderin gəlişi, bir millətin taleyi”
Ümummilli Lider Heydər Əliyevin hakimiyyətə gəlməsinin 56-cı ildönümüdür
Polise.az yazır:
Bakı, 14 iyul 2025 — Bu gün Azərbaycanın müasir tarixində mühüm yer tutan bir tarixin – ümummilli lider Heydər Əliyevin hakimiyyətə gəlməsinin 56-cı ildönümüdür. 1969-cu ilin 14 iyulunda Azərbaycan Kommunist Partiyası Mərkəzi Komitəsinin birinci katibi seçilən Heydər Əliyev, respublikaya rəhbərliyə başladığı gündən ölkənin sosial-iqtisadi və mədəni inkişafında yeni bir mərhələnin əsasını qoydu.
O dövrdə Azərbaycan Sovet İttifaqı çərçivəsində iqtisadi və sənaye baxımından geri qalmış respublikalar sırasında idi. Lakin Heydər Əliyevin uzaqgörən siyasəti, idarəçilik bacarığı və gərgin fəaliyyəti nəticəsində Azərbaycan sürətlə inkişaf etməyə başladı. Onun rəhbərliyi ilə həyata keçirilən struktur islahatları, yeni zavod və fabriklərin tikintisi, təhsil və mədəniyyət sahələrində atılan addımlar ölkənin gələcək inkişafının təməlini qoydu.
Heydər Əliyevin təşəbbüsü ilə minlərlə azərbaycanlı gənc keçmiş SSRİ-nin qabaqcıl ali məktəblərinə göndərilərək yüksək ixtisaslı kadrlar kimi yetişdirildi. Eyni zamanda milli kimliyin qorunması, ana dilində təhsilin və mədəni irsin inkişafı sahəsində mühüm tədbirlər həyata keçirildi. Bu dövrdə Azərbaycanın elmi və intellektual potensialı əhəmiyyətli dərəcədə gücləndi.
Ümummilli liderin 1969-cu ildə başladığı liderlik missiyası yalnız o dövr üçün deyil, müstəqil Azərbaycanın gələcəyi üçün də möhkəm təməl oldu. 1993-cü ildə xalqın təkidli tələbi ilə yenidən hakimiyyətə qayıdan Heydər Əliyev, ölkəni parçalanmaqdan xilas edərək sabitlik və inkişaf yoluna çıxardı.
Bu gün Azərbaycanın hər bir bölgəsində, qurulan hər bir müəssisədə, təməli qoyulan hər bir layihədə Heydər Əliyev məktəbinin, onun idarəçilik fəlsəfəsinin izləri hiss olunur. Onun siyasi irsi bu gün Prezident İlham Əliyev tərəfindən uğurla davam etdirilir.
Ümummilli liderin hakimiyyətə gəlişinin 56-cı ildönümü münasibətilə ölkənin müxtəlif bölgələrində tədbirlər keçirilir, xatirəsi ehtiramla yad olunur. Bu gün xalq öz liderini, onun göstərdiyi yolla inamla irəliləməyin qürurunu yaşayır.
Südabə Əliyeva
Polise.az
