BMT-nin Baş katibi: Afrika ədalətsizliyin ikiqat qurbanıdır

BMT-nin Baş katibi Antonio Quterreş çərşənbə axşamı Afrikaya güclü dəstəyini ifadə edərək, rəhbərlik etdiyi təşkilatın əməkdaşlığı gücləndirmək üçün Afrika İttifaqı ilə işləməyə hazır olduğunu bildirib.

Polise.az  BMT-nin saytına istinadla xəbər verir ki, Antonio Quterreş Afrika İttifaqı Komissiyasının sədri Musa Faki Mahamat ilə keçirdiyi mətbuat konfransında deyib. “Afrika ədalətsizliyin ikiqat qurbanı olub. Birincisi, müstəmləkəçilik və köləliklə əlaqəli tarixi ədalətsizlik. İkincisi, dünyada güc münasibətlərinin qurulması üsulu ilə bağlı, daha doğrusu, maliyyə və iqtisadi gücə münasibətdə indiki ədalətsizlik”. Bu bəyanatdan əvvəl BMT-nin Baş katibi ilə Afrika İttifaqı Komissiyasının sədri arasında insan hüquqlarına dair yeni birgə çərçivə sazişi də imzalanıb.

A.Quterreş Afrika İttifaqı ilə BMT arasında tərəfdaşlığın vacib olduğunu və Afrikanın bu təşkilat üçün “əsas prioritetlərdən biri” olaraq qaldığını söyləyib. O əlavə edib: “Hər şeydən əvvəl, Afrikaya beynəlxalq münasibətlərdə ədalət lazımdır, çünki Afrika beynəlxalq münasibətlərimizin struktur ədalətsizliklərinin qurbanı olub. Eyni zamanda, demək istərdim ki, biz ümumi fəaliyyətimizin bütün sahələrində Afrika İttifaqı ilə işləməyə tam sadiqik”.

Musa Faki Mahamat bildirib ki, Afrika sülh və təhlükəsizlik baxımından çətin bir dövr yaşayır. O qeyd edib: “Təəssüf ki, bu qitə terrorizm və ekstremizmin sığınacağına çevrilib. Bizim bir çox rayonlarımız bu hadisələrdən təsirlənir”.

Mətbuat konfransında vurğulanıb ki, Afrika COVID-19 böhranı, iqlim dəyişikliyi və Ukrayna ilə Rusiya arasında davam edən müharibə səbəbindən iqtisadi çətinliklərlə üzləşir. Ukrayna müharibəsindən sonra dayandırılan üç Ukrayna Qara dəniz limanından taxıl ixracını bərpa etmək üçün Türkiyə və BMT-nin vasitəçiliyi ilə keçən ilki Qara dəniz taxıl müqaviləsinə toxunan Mahamat bu müharibənin bütün dünyaya, xüsusən də Afrika qitəsinə birbaşa təsir etdiyini deyib. O, həmçinin enerji, ərzaq məhsulları və gübrələrin qiymətlərindəki artımların Afrika kənd təsərrüfatının məhsuldarlığına mənfi təsir göstərdiyini bildirib. “Ona görə də biz Baş katibin Türkiyə ilə birlikdə taxıl sazişinə nail olmaq üçün göstərdiyi səyləri alqışladıq”, – deyə o vurğulayıb.

Polise.az