Böyük Britaniya Hörmüzlə bağlı hərəkətə keçdi: Çoxmillətli koalisiya qurulmalıdır…

Böyük Britaniya Hörmüz boğazında gəmilərin sərbəst keçidini təmin etmək üçün planın hazırlanmasında ABŞ-a dəstək verir.

Polise.az Musavat.com -a istinadən xəbər verir ki, məlumatı Böyük Britaniya Müdafiə Nazirliyinin nümayəndələri açıqlayıblar.

“The Times” qəzetinin nazirlik rəsmilərinə istinadən yaydığı məlumata görə, ABŞ-a kiçik bir hərbi planlaşdırıcı qrup göndərilib. Britaniyalı mütəxəssislərin Yaxın Şərqdə hərbi əməliyyatlara cavabdeh olan ABŞ Mərkəzi Komandanlığının (CENTCOM) qərargahının yerləşdiyi Florida ştatının Tampa şəhəri yaxınlığındakı MakDill Hərbi Hava Qüvvələri Bazasına getdikləri bildirilir.

Britaniya mütəxəssisləri boğazdan gəmilərin təhlükəsiz keçidini təmin etmək üçün planlaşdırma və variantların hazırlanmasında kömək etməyə çağırılıb.

Böyük Britaniyanın Birinci Dəniz Lordu general Qvin Cenkins nazirlərə hazırkı vəziyyətdə Britaniyanın hərəkətləri üçün müxtəlif variantlar təqdim edib.

Nəşrin qeyd etdiyinə görə, Britaniya hərbi gəmilərinin boğazdan ticarət gəmilərini müşayiət etmək üçün göndərilməsi nəzərdə tutulmur. Belə ki, Böyük Britaniya ABŞ və Avropa tərəfdaşları ilə münaqişə bitdikdən sonra nə edilə biləcəyini müzakirə edir.

“Vəziyyət inanılmaz dərəcədə dəyişkəndir”, – deyə nəşr Böyük Britaniya Müdafiə Nazirliyinin adı çəkilməyən yüksək vəzifəli rəsmisindən sitat gətirir:

“Təhdid səviyyəsi o qədərdir ki, müxtəlif ölkələrin hazırkı təhlükənin zirvəsində gəmilərini necə göndərmək istəyəcəyini təsəvvür edə bilmirəm”.

Böyük Britaniyanın Müdafiə üzrə Dövlət Katibinin müavini Al Karnes xatırladıb ki, 1987-ci ildə Hörmüz boğazında patrul xidməti üçün 30 gəmi yerləşdirilmişdi: “Bu, sizə tələb olunan resursların miqyası barədə təsəvvür yaradır”. O, əlavə edib ki, hazırkı vəziyyət daha da mürəkkəbdir və İranın mövcud arsenalı daha genişdir, o cümlədən dəniz minaları, ballistik raketlər, pilotsuz uçuş aparatları, sualtı aparatlar və yerüstü gəmilər:  “Deyərdim ki, bu, çoxmillətli bir həll yolu olmalıdır. Hazırda biz bundan çox uzağıq”.

Polise.az