Paytaxtda taksi sürücülərinə qarşı dələduzluq edən şəxs saxlanılıb
Paytaxtın Nərimanov rayonu ərazisində taksi sürücülərinə qarşı dələduzluq edilib.
Bu barədə Daxili İşlər Nazirliyinin mətbuat xidmətindən Polise.az -a məlumat verilib.
Rayon ərazisində taksi fəaliyyəti ilə məşğul olan beş nəfər Nərimanov Rayon Polis İdarəsinin 16-cı polis şöbəsinə müraciət edərək avtomobillərinə müştəri kimi əyləşən şəxsin onlara üzərində “etibarsız” yazılan 50 və 100 manatlıq əsginaslar verib əvəzində isə pulun qalığını aldığını bildiriblər. Şöbə əməkdaşlarının həyata keçirdikləri əməliyyat tədbirləri nəticəsində həmin qanunazidd əməlləri törətməkdə şübhəli bilinən 1983-cü il təvəllüdlü əvvəllər məhkum olunmuş Hafiz Mahmudov saxlanılıb. Onun üzərinə keçirilən baxış zamanı dələduzluq edərkən istifadə etdiyi üzərində “etibarsız” yazılan 50, 100 və 200 manatlıq saxta əsginaslar aşkarlanaraq götürülüb. Taksi sürücülərinə qarşı dələduzluq edən şəxsin hərəkətləri ərazidə quraşdırılan kameralar vasitəsi ilə də qeydə alınıb.
Nərimanov Rayon Polis İdarəsinin 16-cı polis şöbəsi əməkdaşlarının keçirdikləri daha bir əməliyyat tədbiri nəticəsində inzibati ərazidəki geyim mağazalarından birində olan seyfdən 2072 manat oğurlayan paytaxt sakini Şəhriyar Hüseynov da saxlanılıb. Bu şəxsin törətdiyi oğurluq hadisəsi də geyim mağazasındakı kameralar vasitəsilə qeydə alınıb. H.Mahmudov və Ş.Hüseynovun paytaxtın müxtəlif ərazilərində analoji cinayətlər törətmələri istisna edilmir. Onların qanunsuz əməllərindən zərərçəkən başqa vətəndaşlar varsa polis orqanlarına müraciət edə bilərlər.
