Polis əməkdaşları bayram günlərində şəhid ailələrini ziyarət ediblər-FOTO
Cənub bölgəsinin rayonlarında polis əməkdaşları Novruz bayramı münasibətilə şəhid ailələrini ziyarət ediblər.
Polise.az xəbər verir ki, Astara, Lerik, Masallı, Biləsuvar və Cəlilabadda rayon polis şöbələrinin əməkdaşları Vətən müharibəsi və antiterror tədbirləri zamanı şəhid olmuş hərbi qulluqçuların ailələrinə baş çəkiblər. Onlarla həmsöhbət olub, qayğıları ilə maraqlanıblar. Gətirdikləri bayram sovqatlarını onlara təqdim ediblər.
Ziyarətlər zamanı Vətən müharibəsində qazanılan tarixi Qələbədən, şəhidlərimizin keçdiyi döyüş yolundan, göstərdikləri şücaət və qəhrəmanlıqlardan danışılıb. Onların müqəddəs amal uğrunda canlarından keçdikləri, əziz xatirələrinin daim qəlbimizdə yaşayacağı bir daha vurğulanıb.
Şəhid ailələrinin üzvləri göstərilən diqqət və qayğıya görə ölkə rəhbərliyinə minnətdarlıqlarını ifadə ediblər.
