PREZİDENT SALEH MƏMMƏDOVU İŞDƏN ÇIXARDI – Yerinə Vüsal Nəsirli təyin olundu + DOSYE (Yenilənib)
Saleh Məmmədov Azərbaycan Avtomobil Yolları Dövlət Agentliyi (AAYDA) İdarə Heyətinin sədri vəzifəsindən azad edilib.
“AzPolitika” xəbər verir ki, Prezident İlham Əliyev bununla bağlı Sərəncam imzalayıb.
Prezidentin digər Sərəncamı ilə Vüsal Nəsirli (AAYDA) İdarə Heyətinin sədri təyin edilib.
Vüsal Nəsirli bundan öncə əmək və əhalinin sosial müdafiəsi nazirinin müavini olub.
Qeyd edək ki, Vüsal Nəsirli 1978-ci ildə İmişli şəhərində anadan olub.
2000-ci ildə Qafqaz Universitetinin İnzibati idarəetmə fakültəsinin Dövlət və bələdiyyə idarəetməsi ixtisası üzrə bakalavr, 2002-ci ildə magistr pillələrini bitirib.
2009-2013-cü illərdə İqtisadi İnkişaf Nazirliyində “Bərk məişət tullantılarının vahid idarəçiliyi” layihəsinin direktor müavini, 2013-2018-ci illərdə İqtisadiyyat Nazirliyinin Beynəlxalq təşkilatlarla əməkdaşlıq şöbəsinin müdir müavini vəzifələrində işləyib.
Hazırkı vəzifəsinə qədər əmək və əhalinin sosial müdafiəsi nazirinin müşaviri, daha sonra isə müavini vəzifəsində çalışıb.
Evlidir, iki övladı var.
Prezident İlham Əliyevin Sərəncamı ilə işdən çıxarıan Saleh Ərşad oğlu Məmmədov 1958-ci ildə Tərtər rayonunda anadan olub. Orta məktəbi bitirdikdən sonra Azərbaycan İnşaat Mühəndisləri İnstitutunun “Sənaye və mülki tikinti” fakültəsinə daxil olub və 1980-ci ildə həmin fakültəni müvəffəqiyyətlə bitirib.
1982–1991-ci illərdə “Yoltəmirtikinti” Baş İdarəsinin 1 saylı Yol Tikinti İdarəsində mühəndis, baş mühəndis və rəis vəzifələrində çalışıb. 1991–1993-cü illərdə “Azərneft” Yol Tikinti Təmir Trestinin 3 saylı Yol Tikinti İdarəsinin rəisi, 1994–1995-ci illərdə isə “Azkommunkomplekttexnika” İstehsalat Birliyində rəhbər vəzifədə işləyib.
1995–2003-cü illərdə “Azəravtoyol” Dövlət Şirkətinin Körpü Tikinti Trestində rəis müavini, 1 saylı Yerli Avtomobil Yolları İdarəsinin rəisi, Siyəzən 4 saylı Yol İstismar İdarəsinin rəisi və 1 saylı Yol İstismar İdarəsinin rəisi vəzifələrində fəaliyyət göstərib.
2003–2015-ci illərdə Nəqliyyat Nazirliyinin “Yolnəqliyyatservis” Departamentinin 1 saylı Yol İstismar İdarəsinin rəisi olub. 2007-ci ildə qurum “Azəryolservis” ASC-yə çevrildikdən sonra həmin idarənin rəisi vəzifəsində işləməyə davam edib.
2015-ci ildə Bakı Dövlət Universitetinin Hüquq fakültəsini bitirib. Həmin ilin 19 fevral tarixində “Azəryolservis” ASC sədrinin birinci müavini təyin olunub və bir müddət sədr vəzifəsini icra edib.
Prezident İlham Əliyevin 28 dekabr 2015-ci il tarixli sərəncamı ilə “Azəryolservis” ASC-nin sədri təyin edilib. 2016-cı ildə qurumun adı dəyişdirilərək “Azəravtoyol” ASC adlandırılıb.
12 dekabr 2016-cı ildə Azərbaycan Həndbol Federasiyasının prezidenti seçilib.
Saleh Məmmədov yol təsərrüfatı sahəsində çalışdığı illərdə respublikanın beynəlxalq əhəmiyyətli E-119, AH-8, M-1, M-2 və M-4 magistral avtomobil yollarının bir hissəsinin istismarı və yerli əhəmiyyətli yolların idarə olunmasına rəhbərlik edib.
6 fevral 2026-cı il tarixində Prezidentin sərəncamı ilə Azərbaycan Avtomobil Yolları Dövlət Agentliyi İdarə Heyətinin sədri vəzifəsindən azad edilib.
Saleh Məmmədov ailəlidir, dörd övladı var.
Elman
“AzPolitika.info”
