Qaxda yol polisinin keçirdiyi reyddə 15 sürücü cərimələnib
Atmosferin nəqliyyatdan atılan zərərli qazlarla çirkləndirilməsinin qarşısının alınması məqsədilə Qax Rayon Polis Şöbəsinin Dövlət Yol Polisi bölməsinin əməkdaşları tərəfindən rayon ərazisində hərəkətin intensiv olduğu küçə və yollarda reyd keçirilib.
DİN-in Mətbuat Xidmətinin Şəki regional qrupundan polise.az-a verilən məlumata görə, reyd zamanı 60-dək avtomobil saxlanılaraq xüsusi cihazlar vasitəsilə onlardakı zərərli qazların miqdarı yoxlanılıb. Yoxlama zamanı bəzilərinin atmosferə normadan artıq tullantı ixrac etdiyi müəyyən olunub. Həmin avtomobillərin sahibləri ilə yol polisi əməkdaşları izahedici söhbətlər aparıb və standartlara cavab verməyən 15 nəqliyyat vasitəsinin sürücüsü barəsində inzibati qaydada tədbir görülüb.
