Sabiq nazirin İspaniyadan Kanadaya qədər səpələnən milyonları
Azərbaycanın ayrı-ayrı yüksək vəzifə sahiblərinin ölkədə korrupsiya, rüşvət yolu ilə əldə etdiyi pulları xarici ölkərə çıxarması günümüzün reallıqlarında adi hal kimi qəbul olunur.
Ancaq sabiq MTN şefi Eldar Mahmudovla bağlı araşdırmalar isə ağlasığmaz faktları üzə çıxarır.
Qeyd edək ki, bu yaxınlarıda Böyük Britaniyanın maliyyə istintaqçıları sabiq MTN şefinin övladlarının bu ölkədəki milyonlarının izinə düşüb. Ən gülünəsi isə budur ki, Mahmudovun prosesdəki vəkilləri bu milyonların guya sabiq nazirin ulu babasından qaldığını iddia edir.
Gununsesi.org-un yeni bir araşdırmasında Eldar Mahmudovun ölkədə cinayət yolu ilə əldə etdiyi milyonların daha bir ünvanı tapılıb.
Hələ Azərbaycanın milli təhlükəsizlik naziri olduğu dönəmdə İran əsilli Kazım Əsgəri (Askari Pooneh Kazem” adlı İspaniya vətəndaşı ilə birgə biznes fəaliyyətinə başlayan Eldar Mahmudov bu işə sabiq nəqliyyat naziri Ziya Məmmədovu da cəlb etmişdi. Bakıda yaşayış binalarının tikintisi ilə məşğul olan “üçlük” tikinti bumunun geniş vüsət aldığı dövrdə on milyonlarla vəsait əldə etmişdilər.
Milli Təhlükəsizlik Nazirliyində yaratdığı mütəşəkkil cinayətkar dəstənin əməlləri nəticəsində yüz milyonlarla vəsait əldə edən Eldar Mahmudov bu pulları dünyanın bir neçə ölkəsinə çıxara bilmişdi.Bu prosesdə yuxarıda adını qeyd etdiyimiz Kazim Əsgəri (Askari Pooneh Kazem) Mahmudovun “çirkli pullarını” Kanadada və İspaniyada yuya bilib.
Kazım Əsgərinin adına (ASKARİ POONEH KAZEM) Kanadada “Main Development” təsis edilən şirkət 2015-ci ildə Milli Təhlükəsizlik Nazirliyinin sifarişi əsasında Avropa oyunları zamanı ərazini Mojix STAR senser təhlükəsizlik şəbəkəsi ilə təmin etmişdi.
“MAİN DEVELOPMENT”in Azərbaycanda da törəmə şirkəti də var. Qanuni təmsilçisi VİDADİ HABİLOV ƏMİRƏLİ OĞLUdur. “MAİN DEVELOPMENT AZERBAİJAN LTD” TÖRƏMƏ ŞİRKƏTİnin nizamnamə kapitalı 10000.00 AZN, hüquqi ünvanı YASAMAL RAYONU, MOSKVA PROSPEKTİ, ev 8-dir.
Eldar Mahmudovun Kanadanın Vancouver əyalətində yaşayan Kazım Askerinin adına qeydiyyata aldırdığı daha bir şirkət isə PAK CONSTRUCTION LTD şirkətidir. Tikinti və daşınmaz əmlak sektorunda fəaliyyət göstərir. (Ünvanı: 690 Knockmaroon Rd, West Vancouver, BC V7S 1R6, Kanada).
Bundan başqa Mahmudovun ailəsi bu adamla birlikdə ABŞ-da Texas ştatının Austin şəhərində Core Investment Group, LLc daşınmaz əmlak şirkətinin də həmtəsisçisidir.
İspaniyada təsis olunan “DEVELOPMENT SL”-in aktivləri isə 7.640.000 avro təşkil edir.
Araşdırmamızda Mahmudovlar ailəsinin İspaniyada daha bir neçə şirkətinin üzə çıxdığı bəlli olub. İspaniyada qeydiyyatdan keçirilən ” DOLUNAY SL “şirkətinin aktivləri 10.403.200 avro olub. Bu şirkət də tikinti və daşınmaz əmlak sahəsində fəaliyyət göstərir.
Mahmudovların Kazım Əskəri ilə birlikdə qurduqları şirkətlər İspaniyadakı Mallorca adasında, Palma şəhəri yaxınlığındakı Cas Catalia qəsəbəsindədir.
İspaniyada bu cütlüyə aid daha bir daşınmaz əmlak şirkəti “PEAK SPANISH INVESTMENT SL” 2006-cı ildə təsis olunub. Aktivləri isə 822.982,68 avrodur.
Anar Mahmudovun öz adına olan İspaniyadakı “MACENT INVEST GROUP SL” daşınmaz əmlak şirkətinin aktivləri isə 32.938.404 avro təşkil edir.
Bundan başqa sabiq nazirin oğlu yenə də İspaniyadakı “CAPAS GROUP INVESTMENT SL” şirkətini qurub aktivləri 11.859.111,78 avrodur.
Onun digər şirkəti isə yenə də bu ölkədə 22 VAQUER DE BENDINAT SL-nin aktivləri 5.583.162 avrodur.
Göründüyü kimi Azərbaycan xalqından çapıb-taladığı yüz milyonlarla vəsaiti ölkədən çıxarmağa çalışan Eldar Mahmudov hələ ki, törətdiyi əməllərə görə özünü cəzasızlıq mühitində hiss edir.
