Sergey Lavrov: “İranın maraqları nəzərə alınmadı”
“İndi tənzimləməyə kimin, nə vaxt və ya kömək edə bilmədiyi barədə düşünməməliyik. Bir daha vurğulayım ki, formatın seçimi Azərbaycan və Ermənistan üçün idi. Bunu İran və ya Türkiyə hesabına etmək cəhdləri olmadı”.
Bu fikirləri Rusiya xarici işlər naziri Sergey Lavrov İran Dövlət Televiziyası və Radiosuna verdiyi müsahibəsində deyib. Nazir qeyd edib ki, “Qarabağ münaqişəsi hər hansı bir formata, məsələn “Astana formatı”na (Rusiya, İran, Türkiyə) uyğun olmaya bilər. Amma əsas odur ki, münaqişəni durdura bildik. Mövqeyimiz belədir: Müəyyən bir böhran bölgəsindəki vəziyyətə təsir etmək qabiliyyətinə sahib ölkələr münaqişə tərəflərinə qan tökülməsini dayandırmaq səylərini birləşdirirsə, bu yaxşı bir nümunədir. “Astana formatı”nın əsas tezisi də bunlardır”.
Nazir əlavə edib ki, İranın bu işdəki mənafeləri, ümumiyyətlə, nəzərə alınmadı. Moskva Azərbaycanla Ermənistan arasındakı münasibətlərin ABŞ-ın sanksiyaları kontekstində xüsusi əhəmiyyət kəsb edən İranın tranzit maraqlarına necə təsir edəcəyi barədə Tehranın narahatlığını başa düşür. İllərdir hamı tərəfindən təsdiqlənən əsas prinsipdən imtina etmək mümkün deyil. Yəni münaqişənin nəticəsi bütün bölgədəki münasibətlərin normallaşmasına xidmət etməlidir”.
Lavrovun sözlərinə görə, “Türkiyə Prezidenti Rəcəb Tayyib Ərdoğanın təklifi Qafqazın üç ölkəsi – Ermənistan, Azərbaycan və Gürcüstanla üç qonşusu – İran, Türkiyə və Rusiya arasında iş birliyi qurmağın mümkünlüyündən bəhs edən regional əməkdaşlığa ən yaxşı nümunədir”.
