Sergey Şoyqunun Bakıya səfərinin hərbi-siyasi tərəfləri – Ekspert şərhi
“Rusiya gərək Azərbaycan kimi tərəfdaş, iqtisadiyyatı güclü və ən əsası, ərazisində müxtəlif xalqlarla bərabər, rusların da yaşadığı bir dövləti Ermənistan kimi mono-etnik və anormal bir dövlətə dəyişməsin”.
Bunu AFN-ə açıqlamasında hərbi ekspert Abuzər Əbilov deyib. Onun fikrincə, “Dəniz kuboku” yarışları çərçivəsində Rusiyanın Müdafiə nazirinin Azərbaycana gəlmə dəvətini qəbul etməsi normaldır:
“Bu səfərə tək hərbi yarışlar kontekstində baxılmasına qarşıyam. Rusiyanın Ermənistana davamlı silah göndərməsi fonunda Azərbaycanın Türkiyəyə meyllənmə sürətinin artması əsas səbəbdir. Regionda tarazlaşma siyasəti bəyan edən Rusiya işğalçının tarazlıqdan yayınmasında rol oynayır. Rəsmi Bakının Rusiyanın Azərbaycanla tərəfdaşlıq bəyanının və Azərbaycanın ərazi bütövlüyünün Rusiya tərəfindən tanınması fonunda ərazimizi işğal etmiş Ermənistana silah yardımları etməsinə görə inciklik nümayişi, özünə daha sadiq tərəfdaş seçimi Rusiya hərbi və siyasi elitasının gözündən qaçmayıb. Azərbaycanın incikliyini yumşaltmaq cəhdləri artıq başlayıb”.
A. Əbilov bildirib ki, Rusiya Xarici İşlər Nazirliyinin rəhbəri Sergey Lavrovun Tovuz hadisələrində ermənilərin məramını açıq şəkildə dilə gətirməsi, onların işğalçılıq siyasətini məcburən dolayı yolla deməsi bu siyasətin budaqlarıdır:
“Bunun əsasında isə Rusiya gərək Azərbaycan kimi tərəfdaş, iqtisadiyyatı güclü və ən əsası, ərazisində müxtəlif xalqlarla bərabər, rusların da yaşadığı bir dövləti Ermənistan kimi mono-etnik və anormal bir dövlətə dəyişməsin, Qafqazda hərbi çəkişmələrə yox, sülhə çalışsın”.
Qeyd edək ki, Azərbaycan Respublikasının Müdafiə naziri general-polkovnik Zakir Həsənovun dəvəti ilə Rusiya Federasiyasının Müdafiə naziri, ordu generalı Sergey Şoyqu avqustun 25-də Bakıya işgüzar səfərə gələcək.
