“SSRİ-dən qalma bütün məmurlar və onların uşaqları dərhal hakimiyyət orqanlarından kənarlaşdırılmalıdır…”
“İstər Ukrayna, istərsə də bəzi Şərqi Avropa ölkələrindəki təcrübələr göstərir ki, bu qoca qurdlar hər an öz dövlətlərinə xəyanət edib Rusiyanın tərəfinə keçə bilirlər…”
“Bunun üçün ilk növbədə rusdilli məktəbləri bağlamalı, ölkəmizdə rus təfəkkürlü insanların yetişməsinə icazə verməməliyik…”
“Beynində Rusiyanı böyüdüb öz milli dəyərlərinə aşağılıq kompleksi ilə yanaşan bu insanların ən həlledici anda hansı mövqe tutacağı bəlli deyil…”
“SSRİ-dən qalan bütün dəyərlər sıradan çıxarılmadan ölkəmizin tam təhlükəsizliyini təmin edə bilmərik…”
“Rusiya tərəfindən keçmiş SSRİ sərhədləri boyunca imperiyanı bərpa etmək cəhdləri gerçəkləşəcəyi halda bu prosesin qarşısını almaq üçün qarşı tərəf – demokratik dünya birliyi, ABŞ, Avropa, həmçinin və ən əsası, real təhlükə altındakı postsovet ölkələri, o cümlədən Azərbaycan hansı tədbirləri görməlidirlər və görə bilərlər?”
Moderator.az əməkdaşının ünvanladığı bu suala cavab olaraq siyasi şərhçi Heydər Oğuz aşağıdakıları söyləyib:
“Fikrimcə, demokratik dünya birliyi artıq bu istiqamətdə əlindən gələni etməyə başlayıb və zaman keçdikcə, Rusiyaya qarşı öz təzyiqlərini gücləndirəcək. Amma biz beynəlxalq birliyin himayəsindən çox, özümüzə arxayın olmalı və bəzi zəruri addımlar atmalı, ölkəmizi Rusiyaya bağlamağa və ondan asılı vəziyyətə salmağa çalışan bütün amilləri sıradan çıxarmalı, təhlükəni beşikdə boğmalıyıq. Bunun üçün ilk növbədə rusdilli məktəbləri bağlamalı, ölkəmizdə rus təfəkkürlü insanların yetişməsinə icazə verməməliyik. Çünki bu insanlarda istər-istəməz Rusiyanı böyük görən təfəkkür formalaşır və zamanla onlar rus təsir dairəsinə düşə bilərlər. Beynində Rusiyanı böyüdüb öz milli dəyərlərinə aşağılıq kompleksi ilə yanaşan bu insanların ən həlledici anda hansı mövqe tutacağı bəlli deyil…
Digər tərəfdən, Şərqi Avropa və Baltikyanı respublikalar kimi, rus təsir dairəsindən uzaqlaşmaq üçün lustrasiya siyasəti yürüdülməlidir. Bu isə o deməkdir ki, keçmiş SSRİ-dən qalma bütün məmur və onların uşaqları dərhal hakimiyyət orqanlarından kənarlaşdırılmalıdır. İstər Ukrayna, istərsə də bəzi Şərqi Avropa ölkələrindəki təcrübələr göstərir ki, bu qoca qurdlar hər an öz dövlətlərinə xəyanət edib Rusiyanın tərəfinə keçə bilirlər. Bu cür “canlı minaları” dövlətçiliyimizin təməllərində saxlamaq ən ümdə milli təhlükəsizlik problemidir və dərhal bu təhdid zərərsizləşdirilməlidir…
Xarici iqtisadi və siyasi sahədə Rusiyanın bizim milli imkanlarımızdan faydalanmasına icazə verilməməlidir. Xüsusilə neft-qaz sektorunda və diplomatik nümayəndəliklərimizdə Rusiyaya köməklik göstərən və ya onlarla birgə hərəkət edən hər kəs ağır cəzalara layiq görülməlidir….
Rusiyaya yaxın media qurumları və sosial şəbəkələrdə fəaliyyət göstərən təbliğat qrupları nəzarətə götürülməli, onların fəaliyyətləri ciddi şəkildə araşdırılmalı, lazım gələrsə cəzalandırılmalıdırlar…
Azərbaycanı özünə yaxın bilən dövlətlər, o cümlədən qardaş Türkiyə ilə informatika sahəsində əməkdaşlıq gücləndirilməli, xarici ölkələrdə ortaq diaspora fəaliyyəti mərkəzləşdirilməlidir. Birgə lobbiçilik fəaliyyətinə start verilməlidir…
Rusiya ilə iqtisadi münasibətlərə yenidən nəzər salınmalı, maksimum dərəcədə onunla işbirliklərinə son qoyulmalıdır…
Rusiyanın 200 illik əsarət tariximizdə millətimizin başına gətirdiyi müsibətlər bütün ayrıntılarına qədər incələnməli və bu barədə sənədli filmlər, kinolar çəkilməli, araşdırma yazıları həm öz ölkəmizdə, həm də müxtəlif dillərə tərcümə edilib bütün dünyada yayılmalıdır…
Türkiyə və Pakistan kimi strateji müttəfiqlərimizlə hərbi əməkdaşlıqlarımız artırılmalı, xüsusilə də Türk ordusunun ölkəmizdə təlim bazaları yaradılmalı, əsgərlərimiz o bazalarda yetişdirilməlidir. Yeni hərbi doktrinamız qəbul olunmalı və bu doktrinada dost-düşmən anlayışları açıq şəkildə göstərilməli, xaricdən gələn təhlükələrə qarşı hansı addımlar atılacağı müəyyənləşdirilməlidir. Azərbaycanın hərbi məktəbləri NATO standartlarına uyğun təlim-tərbiyə kodekslərini mənimsəməli, Türkiyədə təhsil alan zabitlərimiz bu məktəblərdə işə cəlb olunmalıdırlar.
Unudulmamalıdır ki, 1918-ci idə qurulan Azərbaycan Cümhuriyyəti Rusiyada təhsil alan generallarımızın bu ölkə ilə döyüşmək istəməməsi səbəbindən asanlıqla təslimiyyət bayrağı qaldırmışdlılar. Onlardan biri hətta “Mən rus ordusuna and içmişəm və ona qarşı silah qaldıra bilmərəm” demişdi. Bu cür asılılıqdan qurtulmaq üçün Azərbaycan Ordusu mütləq rus qafalı zabit heyətindən təmizlənməlidir…
Ümumiyyətlə, SSRİ-dən bizə yadigar qalan bütün dəyərlər sıradan çıxarılmadan ölkəmizin tam təhlükəsizliyini təmin edə bilmərik. Odur ki, bu istiqamətdə kompleks təxirəsalınmaz tədbirlər görülməlidir…”
Təqdim etdi: Sultan Laçın
