Tokayev Nazarbayevi hədəfə çıxardı – “Biz hamısını adbaad tanıyırıq…”
Qazaxıstanda dövlət çevrilişi bir neçə il ərzində hazırlanıb, Dövlət Təhlükəsizliyi Xidməti isə bunu görməyib.
Bu barədə çərşənbə axşamı ölkə Prezidenti Tokayev parlamentdə çıxışında bildirib.
“Hakimiyyətin ələ keçirilməsinə hazırlıq üzərində peşəkarlar işləyib və Almatı şəhərinə nəzarətin itirilməsi real idi”, – deyə o bildirib.
Bəzi şəhərlərdə dövlət təhlükəsizliyi departamentlərinin rəhbərləri silahları və məxfi sənədləri buraxaraq, xidməti binaları tərk ediblər. Bu hücumların arxasında kimin dayandığı araşdırılmalıdır, deyən Tokayev hücumların təkrarlana biləcəyini qeyd edib.
Daha sonra o, məmur aparatını keçmiş Prezident Nazarbayevin hesabına zənginləşməkdə ittiham edib.
Hakimiyyətin sadə insanların həyatı haqqında təsəvvürü yoxdur, ölkədə güclü əmlak təbəqələşməsi var, əhalinin gəlirləri artmalıdır, maliyyə-oliqarx qrupları mənfəət əldə edir, ölkədə böyük müəssisələrin inhisarı hökm sürür.
“Qazaxıstan İnkişaf Bankı bəzi insanların şəxsi bankına çevrilib. Biz hamısını adbaad tanıyırıq, onlar yüksək kabinetlərə çıxışlarından istifadə edərək imtiyazlı şərtlər əldə edirlər”, deyən Tokayev Nazarbayevin ətrafına işarə edib.
Daha sonra o, inhisarçıların pul köçürəcəyi xüsusi “Qazaxıstan xalqı üçün Fond” yaratmağı tapşırıb.
O, bütün bu vəzifələrin icrasını əvvəllər baş nazirin müavini vəzifəsində çalışmış yeni baş nazir Əlixan Smailova həvalə edib.
