Türkiyənin milli müdafiə naziri: Ankaranın prioriteti Suriyada terrorizmin aradan qaldırılmasıdır
Ankara inanır ki, Suriya Milli Ordusu ölkənin bütün ərazisinə nəzarəti bərpa edə biləcək.
AZƏRTAC xəbər verir ki, bu barədə Türkiyənin milli müdafiə naziri Yaşar Güler Suriya ilə həmsərhəd Kilis vilayətinə səfəri zamanı deyib.
Türkiyəli nazirin sözlərinə görə, Suriyanın suverenliyi və bütövlüyünün təmin edilməsi Türkiyənin təhlükəsizliyi üçün də xüsusi əhəmiyyət kəsb edir.
Y.Güler xatırladıb ki, 2011-ci ildən bəri Türkiyənin sərhəd bölgələrinə onlarla raket və minaatan hücumu olub, nəticədə 600-dən çox Türkiyə vətəndaşı terrorçuların əlindən həlak olub, mindən çox insan yaralanıb.
Türkiyəli nazir Türkiyə Silahlı Qüvvələrinin İŞİD terrorçularına qarşı “Fərat qalxanı” əməliyyatını da xatırladıb.
“Türkiyə Silahlı Qüvvələri Suriyada İŞİD terrorçularına faktiki müqavimət göstərən dünyada yeganə ordudur. Yaraqlılarla mübarizədə 67 türk əsgəri şəhid olub”, – deyə Y. Güler bildirib.
Onun sözlərinə görə, Suriyada hakimiyyət dəyişikliyi fonunda qonşu ölkənin inkişafında yeni mərhələ başlayıb.
“Dekabrın 2-də Suriya Milli Ordusu Tall-Rıfat bölgəsini YPG (PKK-nın Suriya qanadı), dekabrın 9-da isə Münbiçi terrorçularından təmizləyib. Biz inanırıq ki, terrorçularla mübarizə Suriyanın bütün ərazisi təmizlənənə qədər davam edəcək. Türkiyə də öz tərəfindən Suriya xalqını dəstəkləmək üçün tədbirlər görməyə davam edəcək”, – deyə türkiyəli nazir əmin edib.
O, bölgədəki bütün aktorları, eləcə də Ankaranın müttəfiqlərini Türkiyənin Suriya problemlərinin həllində əsas oyunçu olduğu faktını etiraf etməyə çağırıb. “Əməkdaşlıq etmək, Türkiyənin və Suriya yeni hakimiyyət orqanlarının uzunmüddətli sülhə doğru atılan addımlarını dəstəkləmək çox vacibdir”, – deyə o qeyd edib.
Y.Güler vurğulayıb ki, məqsədlərindən birinin bölgənin etnik xəritəsini dəyişdirmək olan terrorçulara Suriyanın gələcəyində yer yoxdur.
“Biz terrorçu qrupların Türkiyə və Suriyanın təhlükəsizliyinə təhdid yaradan bütün hərəkətlərini diqqətlə izləyirik. Problemlərin qarşısını almaq üçün tədbirlər görürük. Ankara üçün prioritet Suriyanın ayrı-ayrı ərazilərinə nəzarət edən YPG terror təşkilatının tamamilə məhv edilməsidir”, – deyə türkiyəli nazir əlavə edib.
Polise.az
