“Hörümçək toru” əməliyyatı ABŞ üçün xəbərdarlıqdır – “The Wall Street Journal”

Moderator.az xəbər verir ki, bu barədə “The Wall Street Journal” nəşrində dərc olunmuş məqalədə deyilir.

Qeyd edilir ki, həmin əməliyyat nəticəsində 40-a yaxın Rusiya təyyarəsinin sıradan çıxarılması ABŞ-da ciddi narahatlıq yaradıb. Jurnalistlər qeyd edir ki, bu əməliyyat Amerika üçün iki əsas dərs verir:

1. ABŞ ərazisi düşünüldüyündən daha həssasdır.

2. Gələcək münaqişədə ABŞ vətəndaşları da birbaşa cəbhənin tərkib hissəsinə çevrilə bilər.

Nəşr yazır ki, Ukrayna tərəfindən istifadə edilən “ucuz” PUA-ların Rusiya ərazisinə necə keçirildiyi barədə çox məlumat yoxdur. Buna baxmayaraq, bu dronların bahalı rus bombardmançılarını məhv etməsi ABŞ hərbi rəhbərliyində narahatlıq yaradıb.

ABŞ-ın hərbi analitiki Fred Kaqan bu sualı gündəmə gətirir: “Bunlar B-2 bombardmançıları ola bilərdimi, məsələn, İran dronları ilə və ya Çindən göndərilənlərlə?”

Nəşr qeyd edir ki, ABŞ-ın strateji bombardmançı donanması “soyuq müharibə” dövrü ilə müqayisədə üç dəfə azdır və əsasən cəmi bir neçə bazada cəmlənib. Belə zəifləmiş struktur genişmiqyaslı və koordinasiyalı dron hücumlarına qarşı ciddi təhlükə altındadır.

Məqalədə Donald Tramp tərəfindən təklif edilən raket əleyhinə “Qızıl Günbəz” layihəsinin əhəmiyyəti də vurğulanır. Nəşr bildirir ki, bu sistem əvvəllər lağa qoyulsa da, PUA-lar, casus zepelinlər və sualtı raketlərlə gələcək təhdidlər qarşısında belə bir müdafiə qalxanı vacibdir.

Nəşr müəllifləri bildirir ki, ABŞ vətəndaşları adətən müharibələrin uzaq torpaqlarda gedəcəyini düşünür və bu səbəbdən ciddi hazırlıq görmürlər. Lakin “Hörümçək Toru” əməliyyatı göstərdi ki, müasir dövrdə münaqişə coğrafi sərhədlərlə məhdudlaşmır və ABŞ öz təhlükəsizliyini yenidən qiymətləndirməlidir.

Jurnal nəticə olaraq yazır ki, Ukrayna ABŞ-ın strateji rəqiblərinə qarşı bir xidmət göstərib – bombardmançılarını sıradan çıxarıb və eyni zamanda ABŞ-ı öz arxayınlıq yuxusundan oyadıb.