Türkiyə Təhlükəsizlik Şurası Ukrayna ilə bağlı bəyanat yayıb.

Prezident Rəcəb Tayyib Ərdoğanın sədrliyi ilə keçirilən Türkiyə Təhlükəsizlik Şurasının iclasının yekunlarına dair bəyanatda deyilir ki , Türkiyə Ukraynada sülhün bərqərar olunmasında daha çox məsuliyyət daşımağa hazırdır.

“Müharibənin genişlənmə riskini göstərən hadisələrlə bağlı narahatlıq ifadə edilib və Türkiyənin sülhün bərqərar olması üçün daha böyük məsuliyyəti öz üzərinə götürməyə hazır olduğu bildirilib”, – Türkiyə mətbuatının sitat gətirdiyi bəyanatda deyilir.

Sentyabrda Rusiya prezidenti Vladimir Putinlə görüşdə Türkiyə prezidenti Rəcəb Tayyib Ərdoğan qeyd edib ki, Ankara döyüşləri dayandırmaq və “ədalətli və davamlı sülhün bərqərar olması” üçün səylərini davam etdirir.

Ərdoğan həmçinin dəfələrlə Kiyev və Moskva arasında vasitəçilik etməyi təklif edib, o cümlədən yüksək səviyyəli görüşləri asanlaşdırmağa hazır olduğunu bəyan edib. İlin əvvəlində o, Türkiyənin 2025-ci ilə qədər sülhün əldə olunacağını gözlədiyini bildirmişdi. Həmin vaxt Ərdoğan ədalətli və davamlı sülhün yalnız danışıqlar prosesində hər iki tərəfin bərabərliyi ilə mümkün olduğunu vurğulamışdı. Lakin sentyabrda Türkiyə prezidenti müharibənin tezliklə bitəcəyinə inanmadığını bəyan edib.

Polise.az