ABŞ Rusiyanı “terrorizmin sponsoru olan dövlət” elan edəcək – Senat təsdiqlədi
ABŞ Senatının Xarici Əlaqələr Komitəsi Rusiya tərəfindən qaçırılmış ukraynalı uşaqların geri qaytarılmaması halında Moskvanı “terrorizmin dövlət sponsoru” kimi tanımağı nəzərdə tutan iki partiyalı qanun layihəsini təsdiqləyib.
Senator Graham bildirib:
“Senatın Xarici Əlaqələr Komitəsinin bu qanun layihəsini yekdilliklə təsdiqləməsindən məmnunam. Rusiya işğal olunmuş ərazilərdən qaçırdığı təxminən 20 min ukraynalı uşağı geri qaytarmadığı halda, ABŞ qanunvericiliyinə əsasən, terrorizmin dövlət sponsoru kimi tanınacaq.”
O, uşaqların qaçırılmasını “İkinci Dünya müharibəsindən bəri baş vermiş ən dəhşətli hadisələrdən biri” adlandırıb.
Senator Graham qeyd edib ki, bu addım Moskva üçün ağır iqtisadi və diplomatik nəticələr doğuracaq:
“Rusiyanı terrorizmin dövlət sponsoru kimi tanımaq onun iqtisadiyyatı üçün dağıdıcı olacaq. Əgər qaçırılmış uşaqlar evlərinə qaytarılmazsa, bu, Putinin davranışının qaçılmaz nəticəsi olacaq.”
Layihəyə edilən düzəlişlərə əsasən, Rusiyanın “terrorizmin sponsoru” statusundan çıxması üçün mülki infrastruktura hücumları dayandırması və siyasi rəqiblərə qarşı sui-qəsd cəhdlərinə son qoyması tələb olunur.
Graham bu təşəbbüsü “məsuliyyətin təmin edilməsi istiqamətində mühüm addım” adlandıraraq vurğulayıb ki, dünya Kremlə uşaqları qaçırmaq və mülki əhalini cəzasız şəkildə öldürmək imkanı verməməlidir.
Qeyd edək ki, bundan əvvəl Rusiyanın Uşaq Hüquqları üzrə Müvəkkili Mariya Lvova-Belova işğal olunmuş Mariupoldan 15 yaşlı yetim Polyp adlı ukraynalı uşağı Rusiyaya apardığını etiraf etmişdi. Uşaq Rusiyaya qarşı nifrət bəslədiyini və orada yaşamaq istəmədiyini demişdi.
Polise.az
