Ərdoğan İlham Əliyevi doğum günü münasibəti ilə təbrik etdi – YENİLƏNDİ
Türkiyə Prezidenti Rəcəb Tayyib Ərdoğan Azərbaycan Prezidenti İlham Əliyevə təbrik məktubu ünvanlayıb.
Polise.az xəbər verir ki, məktubda deyilir:
“Cənab Prezident, Əziz Qardaşım.
Sizi doğum gününüz münasibətilə xalqım adından və öz adımdan səmimi-qəlbdən təbrik edir, Zati-alinizə cansağlığı, rifah və ailənizlə birlikdə uzun ömür arzulayıram.
Zati-alinizin bacarıqlı liderliyi və uzaqgörən siyasəti sayəsində Can Azərbaycanın davamlı şəkildə güclənməsi, regional və beynəlxalq siyasətdə nüfuzunun artması bizim üçün böyük məmnunluq və qürur mənbəyidir.
Beşinci ildönümünü birlikdə qeyd etdiyimiz şanlı Vətən müharibəsi Zəfərindən sonra həyata keçirilən sülh prosesinin davamlı bir razılaşma ilə nəticələnməsini arzu etdiyimi bir daha vurğulamaq istəyirəm. İnanıram ki, Qafqazda sabitliyin hökm sürdüyü sülh mühiti bütün regionun inkişafına xidmət edəcəkdir.
Türkiyə və Azərbaycan arasında öz gücünü tarixdən alan dərin köklərə malik qardaşlıq və həmrəylik əlaqələri Ümummilli Lider Heydər Əliyevin bizə miras qoyduğu “Bir millət, iki dövlət” prinsipi ilə hər gün daha da güclənir.
Möhkəm təməllər üzərində qurulmuş müttəfiqlik münasibətlərimiz və hər sahədə nümayiş etdirdiyimiz yüksək səviyyəli əməkdaşlıq sayəsində regionumuzun taleyini və gələcəyini formalaşdıran birgə layihələrimizi həyata keçirmək üçün güclü iradəyə malik olduğumuz birmənalıdır.
Əziz Qardaşım, Sizi bir daha doğum gününüz münasibətilə ürəkdən təbrik edir, fürsətdən istifadə edərək dost və qardaş Azərbaycan xalqının rifah və firavanlığı üçün ən xoş arzularımı çatdırıram”.
***
15:27
Türkiyə Prezidenti Rəcəb Tayyib Ərdoğan Azərbaycan Prezidenti İlham Əliyevi doğum günü münasibəti ilə təbrik edib.
Polise.az xəbər verir ki, bu barədə Türkiyə Prezidenti Administrasiyasının İctimaiyyətlə Əlaqələr Departamentinin rəhbəri Burhanettin Duran bildirib.
O deyib ki, iki Prezident arasında telefon danışığı baş tutub:
“Rəcəb Tayyib Ərdoğan telefon danışığı zamanı Türkiyə ilə Azərbaycanın ticarət başda olmaqla bütün sahələrdə əməkdaşlıq çərçivəsində qarşıya qoyulan hədəflərə çatmaq üçün fəaliyyətlərini davam etdirdiyini bildirib.
O, Azərbaycanla Ermənistan arasında sülh prosesində irəliləyişdən məmnunluq duyduqlarını və bu prosesi dəstəklədiklərini qeyd edib.
Prezident, həmçinin Azərbaycan lideri İlham Əliyevin doğum gününü və Yeni ilini təbrik edib”.
Polise.az
