Putinin Stiv Uitkoff və Cared Kuşnerlə 3 saat davam edən görüşünün detalları bəlli oldu – FOTO-YENİLƏNDİ
Putinin Trampın elçiləri ilə Kremldəki kritik danışıqları üç saatdan çox davam edib.
Polise.az “RIA Novosti” agentliyinə istinadla xəbər verir ki, Rusiya Prezidenti Vladimir Putinin ABŞ prezidentinin xüsusi nümayəndəsi Stiv Uitkoff və Ağ Ev rəhbərinin kürəkəni Cared Kuşnerlə Kremldəki görüşü üç saatdan artıq çəkib. Qapalı müzakirələrdə Rusiya tərəfindən həmçinin prezidentin köməkçisi Yuri Uşakov və Kirill Dmitriyev də iştirak ediblər.
Danışıqların ana xəttini Ukrayna münaqişəsinin tam nizamlanması və Donald Trampın müharibəni bitirmək üçün göndərdiyi xüsusi sülh təklifləri təşkil edib. Putin görüşün əvvəlində Vaşinqtonla təmasları müsbət qiymətləndirdiyini desə də, Ukrayna ətrafındakı mövcud hərbi-siyasi vəziyyətin kifayət qədər mürəkkəb olduğunu xüsusi vurğulayıb. Amerikalı diplomatlar Moskvadakı bu marafon danışıqlardan dərhal sonra sülh paketini müzakirə etmək üçün Kiyevə yola düşəcəklər.
***
05.09.2026
22:24
“Tramp Ukrayna münaqişəsinin nizamlanmasına töhfə vermək cəhdlərini dayandırmır”.
Polise.az TASS-a istinadla xəbər verir ki, Rusiya Prezidenti Vladimir Putin Kremldə ABŞ elçiləri Stiv Uitkoff və Cared Kuşnerlə görüşündə Donald Trampın sülh təşəbbüslərini yüksək qiymətləndirib.
“Anlayıram ki, bütövlükdə cənab Tramp kifayət qədər mürəkkəb bir vəziyyətlə qarşılaşıb. Buna baxmayaraq, o, Rusiya-Ukrayna münaqişəsinin nizamlanmasına öz töhfəsini vermək cəhdlərini dayandırmır.
Bu gün rəsmi Vaşinqtonun nümayəndələri ilə söhbətimiz mövcud böhranın bütün tərkib hissələri və hər bir aspekti üzrə aparılacaq. Biz də öz növbəmizdə vəziyyəti necə gördüyümüz barədə sizi ətraflı şəkildə məlumatlandırmağa tam hazırıq”.
***
05.09.2026
21:09
Rusiya Prezidenti Vladimir Putin Kremldə ABŞ nümayəndə heyəti – Stiv Uitkoff və Cared Kuşnerlə keçirdiyi görüşün əvvəlində diqqətçəkən bəyanat verib.
Polise.az TASS agentliyinə istinadla xəbər verir ki, Rusiya lideri amerikalı diplomatlara müraciət edərək, “Müzakirəyə başlamazdan əvvəl, sizdən Amerika Birləşmiş Ştatlarının Prezidenti cənab Trampa mənim ən xoş arzularımı və təşəkkür sözlərimi çatdırmağınızı xahiş etmək istəyirəm”, – deyə bildirib.
O həmçinin tərəflər arasında müzakirə edilən geosiyasi vəziyyətin və Ukrayna böhranının kifayət qədər mürəkkəb olduğunu xüsusi vurğulayıb.
***
05.09.2026
20:42
ABŞ prezidentinin xüsusi nümayəndəsi Stiv Uitkoff və Ağ Ev rəhbərinin kürəkəni Cared Kuşner bu gün Moskvada Rusiya Prezidenti Vladimir Putinlə görüşmək üçün Kremlə gəliblər.
Polise.az TASS-a istinadla xəbər verir ki, Amerika nümayəndə heyətini Kremldə Rusiyanın birbaşa investisiyalar fondunun rəhbəri və prezidentin xüsusi nümayəndəsi Kirill Dmitriyev müşayiət edib.
Rusiya liderinin mətbuat katibi Dmitri Peskov dövlət başçısının amerikalı vasitəçilərlə Ukrayna münaqişəsinin həlli yollarını müzakirə edəcəyini rəsmən təsdiqləyib.
Qeyd olunub ki, bu, Stiv Uitkoffun Ukrayna böhranı ilə bağlı Kremlə rəsmən 8-ci səfəridir. ABŞ nümayəndə heyəti Moskvadakı kritik təmaslardan dərhal sonra Ukrayna tərəfi ilə danışıqlar aparmaq üçün Kiyevə yola düşəcək.
