Kobaxidze BMT-dəki çıxışında Azərbaycandan danışdı
“Gürcüstan Azərbaycan və Ermənistan arasında sülh prosesində əldə edilmiş irəliləyişi alqışlayır”.
Polise.az xəbər verir ki, bunu Gürcüstan Baş naziri İrakli Kobaxidze BMT Baş Assambleyasının 81-ci sessiyasının yüksək səviyyəli həftəsi çərçivəsində keçirilən “Çoxtərəfli Tərəfdaşlıq Sammiti”ndəki çıxışında deyib.
“Gürcüstan ərazisinin 20 faizinin davam edən işğalı burada yaşayan insanların həyatına və hüquqlarına təsir göstərir. Biz işğaldan azad edilmə, barışıq və münaqişədən zərər çəkmiş insanlar arasında etimadın bərpası yolu da daxil olmaqla, münaqişənin sülh yolu ilə həllinə sadiq qalırıq. Bu prosesin mühüm hissəsi Gürcüstanın suverenliyinə və ərazi bütövlüyünə beynəlxalq dəstəkdir. Effektiv multilateralizm həmçinin daha sıx regional əməkdaşlığı tələb edir. Eyni regionun ölkələri təhlükəsizlik və iqtisadiyyat sahələrində ümumi çağırışlarla üzləşirlər, daha sıx əməkdaşlıq isə bu çağırışlara daha effektiv şəkildə reaksiya verməyə imkan yaradır.
Cənubi Qafqaz mühüm dəyişikliklər dövründən keçir və onun iqtisadi-strateji potensialına getdikcə daha çox diqqət yetirilir. Bu gün praktiki regional əməkdaşlıq üçün daha geniş imkanlar mövcuddur. Biz qonşularımız (Azərbaycan və Ermənistan) arasında sülh prosesində əldə edilmiş irəliləyişi alqışlayırıq və inanırıq ki, gücləndirilmiş regional əməkdaşlıq ticarət, əlaqələndirmə və iqtisadi inkişaf kimi sahələrdə yeni imkanlar yarada bilər”, – Baş nazir bildirib.
İrakli Kobaxidze qeyd edib ki, Gürcüstan uzunmüddətli sülh və rifaha nail olmaq üçün zəruri olan prinsiplərə riayət etməyə sadiq qalır.
