Baş infeksionist əhaliyə müraciət etdi

Artıq 400 mindən çox vətəndaşımız peyvənd olunub.

Bu barədə Səhiyyə Nazirliyinin baş infeksionisti Təyyar Eyvazov məlumat verib.

O bildirib ki, hər gün vaksin olunmaq üçün minlərlə insan könüllü olaraq müvafiq tibb idarələrinə müraciət edir:

“Sevindirici haldır ki, peyvənd olunanların sayı bir il ərzində bu infeksiya ilə xəstələnənlərin rəsmi statistik göstəricilərini üstələyib. Bu o deməkdir ki, yaxın gələcəkdə bu qədər insan infeksiyaya yoluxmayacaq və hətta az sayda yoluxmalar olsa belə, onlar arasında ölüm halları baş verməyəcək. Ümid edirəm ki, tezliklə peyvəndləmənin müsbət effektini hər birimiz öz həyatımızda hiss edəcəyik.

Şayiələrə deyil, elmi faktlara əsaslanaraq peyvəndləmədə könüllü iştirak edək, bu infeksiyaya qalib gələk və normal həyatımıza qayıdaq!”