Tovuzda silahlar susmur, evlər viran qoyulur
Ermənistanın Azərbaycanla sərhəddə Tovuz rayonu istiqamətində törətdiyi təxribatlar zamanı mülki şəxslər hədəfə alınıb.
Oxu.Az-ın təmas xəttinə ezam olunan əməkdaşı xəbər verir ki, Tovuzun Dondar Quşçu kəndində sakinlərin evlərinə zərər dəyib.
Telarə Əliyevanın evinə mərmi düşüb. Evdə yaşayanlar deyir ki, hadisə iyulun 14-də günorta saatlarında qeydə alınıb. Artilleriya atəşi nəticəsində ev tamamilə yararsız hala düşüb.
Telarə Əliyeva bildirir ki, günorta saatlarında mağazaya gedib və 10 dəqiqə sonra evlərinə mərmi atılıb.
Xoşbəxtlikdən xəsarət alan olmayıb. Zərbə nəticəsində qonşuluqda yerləşən, Rəna Əliyevaya məxsus ev də ziyan görüb. Kənd sakinlərindən Şahin Abdıyev də hədəfin qurbanlarındandır. Həyətə düşən mərmi onun evini dağıdıb. İyulun 13-də isə kənd sakini Mahir Sadıqovun evi zərər görüb. Hazırda kənddə nisbi sakitlikdir.
