Nazarbayev Təhlükəsizlik Şurasının rəhbəri vəzifəsini Tokayevə özü təhvil verib?

Qazaxıstanın birinci prezidenti Nursultan Nazarbayev Təhlükəsizlik Şurasının rəhbəri vəzifəsini Kasım-Jomart Tokayevə özü təhvil verib. Bunu birinci prezidentinin mətbuat katibi Aidos Ukibay bildirib.

“Əvvəlcə dediyim kimi, elbası bütün bu günlərdə Nur-Sultanda olub və dövlət başçısına dəstək olub. Lakin vəziyyət çox çətin idi və buna görə də elbası özü Təhlükəsizlik Şurasının sədri vəzifəsini prezidentə vermək qərarına gəlib, çünki o, iğtişaşlar və terrorun ölkə rəhbərliyindən operativ, sərt və barışmaz cavab tələb etdiyini yaxşı bilirdi”.

Onun sözlərinə görə, Nazarbayev və Tokayev hər zaman “barrikadaların bir tərəfində” olub, “öz xalqını, ölkəsini və millətin gələcəyini” müdafiə ediblər: “Və onlar hamımız üçün bu ağır günlərdə dövlət hakimiyyətinin monolitliyini bir daha nümayiş etdiriblər”, – Ukibay bildirib.