ABŞ-dən NATO müttəfiqlərinə Rusiya xəbərdarlığı

ABŞ administrasiyası Avropadakı NATO müttəfiqlərindən Rusiyaya qarşı sərt bəyanatlarını azaltmağı tələb edib. Vaşinqton xüsusilə Baltikyanı ölkələrin Moskva ilə bağlı açıqlamalarından narazılığını ifadə edərək onları daha təmkinli davranmağa çağırıb.

Polise.az xəbər verir ki, Pentaqon Estoniya, Latviya və Litva da daxil olmaqla bir sıra NATO ölkələrinə Rusiyadan gələn təhlükə barədə ritorikanı yumşaltmağı tövsiyə edib.

Məsələ ABŞ Müdafiə Nazirliyinin siyasi məsələlər üzrə rəhbər vəzifəli rəsmisi Elbric Kolbinin (Elbridge Colby) avropalı tərəfdaşlarla görüşlərində müzakirə olunub.

Kolbi ABŞ-nin Avropadakı hərbi qüvvələrinin sayına yenidən baxılması prosesində əsas rol oynayan şəxslərdən biridir.

Amerikalı rəsmilərin diqqətini xüsusilə Avropa liderlərinin Rusiyanın Ukraynadakı müharibə nəticəsində “küncə sıxılmış siçovul” vəziyyətinə düşdüyü və buna görə getdikcə daha çıxılmaz addımlar atdığı barədə bəyanatları cəlb edib.

“Reuters”in mənbələrindən biri bildirib ki, Vaşinqton belə ifadələri faydasız hesab edir.

Məlumata görə, Kolbi Baltikyanı ölkələrdən birinin nümayəndələrinə Rusiyanı qıcıqlandırmaqdan çəkinməyi və təmkin nümayiş etdirməyi tövsiyə edib.

Avropalı rəsmilərdən biri Pentaqonun mesajını belə təsvir edib:

“Biz sizə kömək edirik. Amerikalılar buradadır. Sadəcə, səs-küy salmayın. Hay-küy yaratmayın”.

Agentliyin həmsöhbətləri bildiriblər ki, ABŞ tərəfinin müraciəti qarşıdurma və ya ultimatum formasında olmayıb. Bununla belə, Vaşinqtonun bu mövqeyi avropalı müttəfiqlər arasında təəccüb doğurub.

Pentaqon isə NATO ölkələrinə belə müraciət edildiyini rəsmən təsdiqləməyib.

“Müttəfiqlər arasında keçirilən qapalı söhbətlər elə qapalı söhbətlər olaraq qalır. Buna görə də bu iddiaları şərh etməyəcəyik”, – deyə ABŞ Müdafiə Nazirliyinin nümayəndəsi bildirib.

“Reuters” xatırladır ki, sentyabrın sonunda Estoniyanın Baş naziri Kristen Mixal Vladimir Putini “küncə sıxılmış siçovul” adlandırıb.

Mixalın fikrincə, Rusiya Ukraynada müharibəyə getdikcə daha dərindən cəlb olunduğu üçün Avropada diversiya əməliyyatlarına əl atır.

Rusiya ilə həmsərhəd olan Baltikyanı ölkələr isə Moskvanın mümkün hərbi və hibrid təhdidlərindən ciddi narahatlıq keçirirlər.

Son bir ildə onların ərazilərinə pilotsuz uçuş aparatlarının daxil olması ilə bağlı hadisələr bu narahatlığı daha da artırıb.

Avropa ölkələri Rusiyanı müxtəlif diversiya əməliyyatlarında da ittiham edirlər.

Son hadisələrdən biri Almaniyada qeydə alınıb. Leypsiq hava limanında Ukraynaya məxsus yük təyyarəsinin yaxınlığında partlayıcı qurğu bərkidilmiş pilotsuz uçuş aparatı aşkar edilib.

Rusiya Prezidenti Vladimir Putin isə dəfələrlə Moskvanın Avropa ilə müharibə istəmədiyini və NATO ölkələrinə hücum planlaşdırmadığını bəyan edib.

Bununla belə, o, mümkün hərbi qarşıdurmaya hazır olduqlarını da bildirib.

“Əgər məsələ həddindən artıq uzağa getsə, ümumiyyətlə, qalib olmayacaq. Qoy heç kim bunu unutmasın”, – deyə Putin xəbərdarlıq edib.

Beləliklə, “Reuters”in məlumatı ABŞ ilə Avropadakı bəzi NATO müttəfiqləri arasında Rusiyaya münasibətdə yanaşma fərqlərini üzə çıxarır.

Baltikyanı ölkələr Moskvanın təhlükəsini daha sərt ifadələrlə gündəmə gətirməyə çalışdıqları halda, Vaşinqtonun hərbi rəhbərliyi belə bəyanatların gərginliyi artırmasından narahat görünür.

Xüsusilə ABŞ-nin Avropadakı hərbi mövcudluğuna yenidən baxıldığı bir vaxtda Pentaqonun müttəfiqlərə daha təmkinli davranmaq çağırışı NATO daxilində Rusiya ilə münasibətlərin gələcəyi barədə yeni suallar doğurur.

 

 

Polise.az