“Elektron ticarət haqqında” Qanunun tətbiq dairəsi dəyişdirilə bilər

“Elektron ticarət haqqında” Azərbaycan Respublikasının Qanununun tətbiq sahəsinə dair müddəanın dəyişdirilməsi təklif olunur.

Polise.az xəbər verir ki bu məsələ Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında gündəliyə daxil edilib.

Qanun layihəsinin müşayiətedici arayışında Qanunun yalnız ölkə ərazisində həyata keçirilən elektron ticarətə tətbiqini nəzərdə tutan məhdudiyyətin ləğv edilməsi qeyd olunur.

Təklif olunan dəyişiklik elektron ticarət sahəsində normativ hüquqi bazanın təkmilləşdirilməsi və mövcud maneələrin aradan qaldırılması məqsədi daşıyır.

Layihədə Qanunun 2.1-ci maddəsinin mətni də təqdim edilib. Həmin maddəyə əsasən, maliyyə bazarı, o cümlədən sığorta və qiymətli kağızlar bazarı istisna olmaqla, Qanun Azərbaycanda digər sahələrdə həyata keçirilən elektron ticarətə şamil olunur.

Qeyd edək ki, layihənin müşayiətedici arayışında tətbiq sahəsinə dair məhdudiyyətin ləğvi nəzərdə tutulsa da, təqdim edilmiş müqayisəli cədvəldə 2.1-ci maddənin mətni dəyişdirilmədən saxlanılıb. Buna görə də həmin müddəa üzrə konkret hüquqi dəyişikliyin məzmunu layihənin yekun redaksiyası əsasında dəqiqləşdirilməlidir.

Polise.az