Erməni qəzeti xəbəri haradan götürüb? “Azərbaycanın alternativləri var”
Ermənistanın “Hraparak” qəzeti baş nazir Nikol Paşinyanın Zəngəzur dəhlizi ilə bağlı Azərbaycanla razılaşdığını yazıb. Qəzetin bildirdiynə görə, rəsmi Yerevan Ermənistan əhalisini Azərbaycan vətəndaşlarının Naxçıvana maneəsiz keçməsi məsələsinə hazırlamağa çalışır. Qəzet qeyd edir ki, maneəsiz keçid rejimində Azərbaycanın əsas hissəsi ilə Naxçıvan arasında yüklər yoxlanmayacaq, yola nəzarət olunmayacaq. Bunu Ermənistanın bəzi rəsmi şəxslərinin, o cümlədən parlament sədri Alen Simonyanın da dəstəklədiyi vurğulanır.
Ermənistan rəhbərliyinin son davranışları “Hraparak” qəzetinin yazdığını təsdiqləyirmi? Ermənistanda hakimiyyətin ictimaiyyəti Azərbaycanla barışığa, sülhə hazırladığı müşahidə edilirmi? Ermənistan tərəfinin Azərbaycanın əsas hissəsi ilə Naxçıvan arasında maneəsiz keçidə razılaşması Bakının Yerevanla sülh müqaviləsi imzalamasına gətirib çıxara bilərmi? Yoxsa bütün bunlar Ermənistanın özünü sülhpərvər göstərməsi, növbəti manipulyasiyasıdır?
Mövzu ilə bağlı Medianews.az-a danışan siyasi şəhçi Oqtay Qasımov bildirib ki, “Hraparak” qəzeti Paşinyana müxalifət qüvvələri dəstəkləyən media qurumudur və daha çox revanşistlərə yaxındır: “Bu qəzetdə yer alan bir çox iddia bəzən manipulyasiya xarakteri daşıyır, həqiqətə uyğun olmur. Məncə, haqqında bəhs etdiyiniz yazı da məlumatdan çox Nikol Paşinyanın, Alen Simonyanın açıqlamalarına söykənən mülahizədir. Belə ki, Paşinyan Ermənistanın yurisdiksiyasında olması şərtilə Azərbaycanın əsas hissəsi ilə Naxçıvan arasında kommunikasiyaların açılmasına hazır olduğunu, Simonyan maneəsiz keçid, yüklərin yoxlanması məsələsində skanerlərdən istifadə ilə kifayətlənməyin mümkünlüyü haqda fikirlər səsləndirib. Məncə, “Hraparak” qəzeti bu fikirlər üzərindən yola çıxaraq belə nəticələr çıxarır. Təbii ki, Azərbaycanın mövqeyi bəllidir və dəfələrlə bəyan edilib”.
Siyasi şərhçi vurğulayır ki, Bakı Yerevandan 2020-ci ildə imzalanmış üçtərəfli bəyanatın şərtlərinə uyğun olaraq Azərbaycanın əsas hissəsindən Naxçıvana keçidin və yüklərin daşınmasının maneəsiz olmasını tələb edir: “Ermənistanın da mövqeyi zamanala buna uyğunlaşmalıdır. Çünki Ermənistan bunu etməyəcəyi halda Azərbaycanın onsuz da alternativləri var. Bu alternativ İran ərazisindən Naxçıvana Zəngəzur yoluna paralel bir yolun çəkilməsidir. Əgər Ermənistan yenə qeyri-konstruktivlik nümayiş etdirəcəksə, əsassız yerə vaxt uzatmağa çalışacaqsa, manipulyasiya ilə məşğul olacaqsa, şübhəsiz ki, Azərbaycan daha Zəngəzur dəhlizində maraqlı olmadığını nümayiş etdirib bu məsələnin gündəmdən qıraqda saxlanmasını istəyəcək. Nəticədə Ermənistan növbəti qlobal layihədən kənarda qalacaq. Bu da Ermənistan üçün kifayət qədər mənfi nəticələrə gətirib çıxaracaq. Belə ki, Zəngəzur dəhlizinin açılması Ermənistanın özünün də maraqlarına çox uyğundur. Bu, Ermənistanın dünyaya açılması üçün olduqca ciddi layihədir. Layihə reallaşarkən Azərbaycan üzərindən dünyanın ən müxtəlif yerlərinə yük daşımalarının həcmində böyük artım ola bilər. Ermənistan da bundan ciddi dividendlər götürə bilər. Əlbəttə ki, Zəngəzur dəhlizi bizim tələblərimizə uyğun olaraq açılacaqsa, maneəsiz keçidə şərait yaradılacaqsa, bu, tərəflər arasında etimad mühiti də formalaşdıracaq və nəticədə sülh prosesini yaxınlaşdıracaq”.
Polise.az
