Həbsdə olan sabiq icra başçısı Vilyam Hacıyev narazıdır- Məhkəmə vəsatətləri qəbul etmədi

İmişli Rayon İcra Hakimiyyətinin sabiq başçısı, həbsdə olan Vilyam Hacıyevin cinayət işi üzrə məhkəmə prosesi keçirilib.

Musavat.com xəbər verir ki, işə Bakı Ağır Cinayətlər Məhkəməsində hakim Azər Paşayevin sədrliyi ilə baxılır.

Bu gün baş tutan prosesdə V.Hacıyevin vəkilləri vəsatətlər qaldırıblar. İlk vəsatət təqsirləndirilən şəxs barəsindəki cinayət işinə xitam verilməsi ilə bağlı olub. Digər vəsatətdə həbs-qətimkan tədbirinin ev dustaqlığı ilə əvəz edilməsi göstərilib.

Vəkillər həmçinin Vilyam Hacıyevin saxlanıldığı Dövlət Təhlükəsizliyi Xidmətinin təcridxanasından Pentensiar Xidmətin təcridxanasına köçürülməsini də istəyiblər. V.Hacıyev özünü təqsirli bilmədiyini deyib. Qeyd edib ki, istintaq zamanı da bunu söyləyib.

O, həbs olunan zaman otağından əmək haqqı kartı aşkar olunmadığını deyib.

“Mən icra başçısı olanda rayonun daxili imkanları sayəsində Qarabağ əlilləri də daxil olmaqla 550 nəfərə yardım olunub. Prezidentə yalan deyiblər”,- deyə V.Hacıyev vəsatətlərə münasibətində bildirib.

Məhkəmə müşavirədən sonra vəsatətlərdən birini təmin edib. V.Hacıyev Penitensiar Xidmətinin Təcridxanasına köçürülüb.

Xatırladaq ki, İmişli Rayon İcra Hakimiyyətinin sabiq başçısı Vilyam Hacıyevin icra hakimiyyətinin sərəncamında olan vəsaitlərin sosial yardım adı altında bir hissəsini ələ keçirilməsini, eləcə də ölkə ərazisində xüsusi karantin rejiminin tələblərinin pozulması ilə sərbəst hərəkət etmək üçün bəzi vətəndaşlara saxta arayışların verilməsini tapşırmasına, vəzifə səlahiyyətlərindən sui-istifadə etməklə mənimsənilən pul vəsaitlərini sahibliyində olan yaşayış evində qəbul etdiyinə əsaslı şübhələr müəyyən olunub.

İstintaq araşdırmaları zamanı, sosial-məişət şəraitinin aşağı olması ilə bağlı mənzil növbəsində olan şəxslərə İmişli şəhərində dövlət büdcəsi vəsaiti hesabına inşa edilmiş çoxmənzilli yaşayış binasında növbəli qaydada verilməli olan mənzillərin Vilyam Hacıyev tərəfindən rüşvət müqabilində qanunazidd verilməsinə əsaslı şübhələr müəyyən edilib.

Vilyam Hacıyevin rayon ərazisində təmir-tikinti, abadlıq işlərinə, habelə İmişli Rayon İcra Hakimiyyətinin yeni inzibati binasının tikintisinə ayrılan dövlət vəsaitlərinin müəyyən hissəsinin müntəzəm nağdlaşdıraraq mənimsəməsinə dair əsaslı şübhələr müəyyən edilib.

Bundan başqa, Vilyam Hacıyevin tabeçiliyində olan vəzifəli şəxslər vasitəsilə yerli icra hakimiyyəti və digər dövlət orqanlarının vəzifəli şəxslərindən, eləcə də rayon ərazisində fərdi sahibkarlıq fəaliyyəti ilə məşğul olan vətəndaşlardan müxtəlif adlar altında pul vəsaitləri tələb edərək almasına dair məlumatlar əldə edilib.

Hamısını Göstər

Related Articles

Back to top button