Netanyahu seçkilərdə qalib gələ bilmədiyini qəbul etmək istəmir… – Məhkəməyə şikayət etməyə hazırlaşır…

İsrailin Baş naziri Benyamin Netanyahunun rəhbərlik etdiyi “Likud” partiyası oktyabrın 27-də keçirilmiş parlament seçkilərinin nəticələrinə hüquqi müstəvidə etiraz etməyi planlaşdırır. Partiya seçkilərin yekun nəticələrinin təsdiqi ilə bağlı səsvermədə açıq şəkildə əleyhinə çıxış etmək əvəzinə bitərəf qalmağa üstünlük verə bilər.

Poliseaz xəbər verir ki, bu barədə İsrailin “Walla” portalı məlumat yayıb.

Nəşrin məlumatına görə, Netanyahunun ofisində keçirilən uzun müzakirələrdən sonra “Likud” rəhbərliyi belə bir qərara meyillənib. Partiya nümayəndələri seçkilərin nəticələrinin təsdiqinə qarşı açıq səs verməyin ictimaiyyətin, xüsusilə də ölkənin ən böyük parlament fraksiyasına münasibətinə mənfi təsir göstərə biləcəyindən ehtiyat edirlər.

Bununla yanaşı, “Likud” nümayəndələri seçki prosesində mümkün qanun pozuntuları ilə bağlı şübhələri əsas gətirərək məhkəməyə müraciət etmək imkanını nəzərdən keçirirlər.

Məlumata görə, İsrail Mərkəzi Seçki Komissiyasının sədri, Ali Məhkəmənin hakimlərindən olan Noam Solberq seçkilərin yekun nəticələrini səsvermə günündən sonra səkkiz gün ərzində dərc etməlidir. İsrail qanunvericiliyinə əsasən, yekun nəticələr dərc olunduqdan sonra 14 gün ərzində Qüds Dairə Məhkəməsinin inzibati işlər üzrə bölməsinə şikayət vermək mümkündür.

Seçki komissiyasının sədri isə bildirib ki, mümkün pozuntularla bağlı şübhələrin təsdiqlənməsi belə, avtomatik olaraq seçkilərin ümumi qanuniliyini və nəticələrini şübhə altına almır. O, həmçinin nəticələrə dair hüquqi mübahisələrə seçki komissiyasının deyil, məhkəmənin baxmalı olduğunu vurğulayıb…

Netanyahunun koalisiya tərəfdaşlarından olan ifrat sağçı “Otsma Yehudit” partiyası isə “Likud”dan fərqli olaraq seçkilərin nəticələrinin təsdiqinə qarşı səs vermək niyyətindədir.

Partiya nümayəndələri “Walla”ya bildiriblər ki, Mərkəzi Seçki Komissiyasının əməkdaşları onları bu addımdan çəkindirməyə çalışıblar. Lakin partiya öz mövqeyini dəyişmək fikrində olmadığını açıqlayıb.

“Otsma Yehudit” seçkilər zamanı nəticələrin təhrif edildiyini iddia edir. Partiya nümayəndələri əsas arqument kimi ərəb əhalisi arasında seçici fəallığının yüksək olmasını, eləcə də xarici dövlətlərdən maliyyələşmə və müdaxilə ehtimallarını göstərirlər.

Qeyd edək ki, bu iddialar seçki nəticələrinin saxtalaşdırıldığını təsdiqləyən sübut kimi təqdim edilməyib.

Oktyabrın 27-də keçirilmiş seçkilərdə “Likud” 120 yerlik Knessetdə 27 mandat qazanaraq ən böyük parlament fraksiyası olub. Lakin Netanyahunun sağçı və dini partiyalardan ibarət koalisiya bloku cəmi 53 mandat əldə edib.

Müxalifət partiyaları 48, ərəb partiyaları isə ümumilikdə 19 mandat qazanıblar. Beləliklə, heç bir siyasi düşərgə hökumət qurmaq üçün tələb olunan 61 mandatlıq çoxluğu əldə edə bilməyib.

Noyabrın 4-də İsrail Mərkəzi Seçki Komissiyası seçkilərin nəticələrinə təsir göstərən qanun pozuntularına dair sübut aşkarlanmadığını açıqlayıb. Komissiya şikayətləri araşdırdıqdan sonra rəsmi nəticələrin seçicilərin iradəsini əks etdirdiyini bildirib. Bununla belə, mümkün xarici müdaxilə ilə bağlı ayrıca təhlükəsizlik araşdırması davam edir.

“The Times of Israel” və “Associated Press”in məlumatlarına görə, rəsmi nəticələrin təsdiqindən sonra Prezident İshak Hersoq parlamentdə təmsil olunan partiyalarla məsləhətləşmələr apararaq yeni hökumətin formalaşdırılması prosesinə başlayacaq.

Beləliklə, İsraildə seçkidən sonrakı siyasi mübarizə artıq təkcə hökumətin kim tərəfindən qurulacağı ətrafında deyil, həm də seçkilərin nəticələrinə etiraz cəhdləri və mümkün məhkəmə çəkişmələri müstəvisində davam edir.

S.Laçın

Polise.az