“Putin Tehranda açıq təxribata əl atıb…” – Ərdoğanla görüş zamanı Putin nə demək istəyib?
Xəbər verdiyimiz kimi, Tehranda keçirilən Astana üçlüyünün sammitində Rusiya və Türkiyə prezidentlərinin ikili görüşü olub. Görüş zamanı V. Putin Ərdoğana deyib ki, bu yaxınlarda Xəzər sammiti çərçivəsində Azərbaycan Prezidenti ilə görüşüb. Və sonra da sosial medianın Azərbaycan seqmentində dərhal müzakirələrə, tənqidlərə səbəb olan bu sözləri söyləyib: “Sizə Əliyevdən böyük salam gətirmişəm”.
Putin bu sözləri sosial mediada geniş müzakirələrə səbəb olub. Onun bu fikirləri söyləməsinin arxasında hansısa məkrli niyyətin dayandığı şübhə doğurmur. Əks halda bir-birinə qardaş deyən iki dövlət başçısının birindən digərinə salamı bir rus prezident niyə gətirməlidir?
Bu ifadələrlə Putin nə demək istəyib?
Təhlükəsizlik eksperti İlham İsmayıl özünün “facebook”dakı hesabında bunu “Putinin təxribatı” adlandırıb: “Tehranda Türkiyə Prezidenti Ərdoğanla görüş zamanı Rusiya Prezidenti Putin açıq təxribata əl atıb. Putin bu yaxınlarda Xəzər sammiti çərçivəsində Azərbaycan Prezidenti ilə görüşdüyünü xatırladıb və Türkiyə Prezidentinə “Sizə ondan böyük salam var” deyib.
Putin bununla nə demək istəyib? Azərbaycan Prezidenti Rusiyaya Türkiyədən daha yaxındırmı? Türkiyədən çox Rusiya iləmi problemlərimizi bölüşürük? Bu, keçməyən təxribatdır. Bunu həm Türkiyənin, həm də Azərbaycanın sıravi vətəndaşlarından tutmuş dövlət başçılarına qədər hamı bilir ki, Türkiyə bizim üçün ən yaxın qardaş ölkədir. Rusiya isə.., bütün bəlalarımızın başında gəlir. Putinin bu təxribatı da indiyədək bizə qarşı yönəlmiş Rusiya təxribatlarının tərkib hissəsidir.’’
“Hesab edirəm ki, ötən gün Vladimir Putin İlham Əliyevlə danışıb. Hətta mənə “İlham Əliyevin salamı var” dedi. O, Əliyevlə danışanda “Ərdoğanla görüşəcəyəm” deyib, Əliyev də “Mənim də salamımı çatdırın” deyib”.
Bu sözləri isə Türkiyə Prezidenti Rəcəb Tayyib Ərdoğan İran səfərindən sonra təyyarədə jurnalistlərin sualını cavablandırarkən bildirib.
“Bilirsiniz ki, Avropa İttifaqı Şurasının Prezidenti Şarl Mişellə Azərbaycan və Ermənistan liderləri üçtərəfli formatda görüş keçiriblər. İlham Əliyevin dediyinə görə, həmin görüş müsbət keçib. O görüşdən sonra İlham Əliyevlə yenidən danışdım. Məndə olan məlumata görə, lazım olan istiqamət üzrə hərəkət edilir”, – deyə Ərdoğan qeyd edib.
Türkiyə lideri yaxın vaxtlarda Zəngilan hava limanının açılışının olacağını diqqətə çatdırıb.
