Vasif Talıbov və oğlu deputat mandatından məhrum ediləcək?
Sabah – 10 yanvar saat 11:00-da Naxçıvan Muxtar Respublikası (NMR) Ali Məclisinin doqquzuncu sessiyası çağırılacaq. Ali Məclisinin keçmiş sədri Vasif Talıbovun istefasından sonra baş verən hadisələr sessiya ilə bağlı bir sıra suallar yaradır.
Maraqlıdır, sessiyada nələr olacaq? Vasif Talıbovun, oğlunun deputat səlahiyyətinə xitam verilə bilər?
Böyük Quruluş Partiyasının sədri, deputat Fazil Mustafa Globalinfo.az-a deyib ki, Naxçıvan Muxtar Respublikası Ali Məclisinin doqquzuncu sessiyasında Vasif Talıbovun, oğlunun deputat səlahiyyətinə xitam verilməsi mümkündür: “Talıbovun istefasından sonra baş verən proseslər də bunu deməyə əsas verir. Sözün düzü, sessiyanın gündəliyi ilə bağlı dəqiq informasiyam yoxdur, lakin Naxçıvanda mütləq şəkildə dəyişikliklər olacaq. Ümumiyyətlə, Talıbovun istefasının ardınca övladının deputat kimi saxlanması siyasi məntiqə sığmır. Hətta özlərinin müraciəti əsasında da nəsə ola bilər.
Naxçıvan Muxtar Respublikası Ali Məclisinin sessiyası nadir hallarda çağırılır. Hətta ildə bir-iki dəfə ancaq olur. Hər halda Naxçıvanda yeni bir dövr başlayır və burada Prezidentin səlahiyyətli nümayəndəsi kimi yeni bir institut yaradılıb”.
Politoloq Qabil Hüseynlinin sözlərinə görə isə, Naxçıvan Muxtar Respublikası Ali Məclisinin doqquzuncu sessiyası çağırılırsa, deməli, ciddi dəyişiklik olacaq: “Hesab edirəm, öncədən nəsə demək doğru deyil, lakin onu demək olar ki, Talıbovun ardınca oğlunun da postunu itirməsi mümkündür. Naxçıvan ölkənin strateji bir nöqtəsidir və burada mərkəzi hakimiyyətin pərçimlənməsi hər şeydən vacibdir.
Hər halda Talıbovlar dövrü qürub edir. Sessiya da bunun göstəricisidir”.
