Aİ-nin alternativ qlobal kommunikasiya təşəbbüsü müsbət nəticələr verir

Avropa İttifaqının (Aİ) Çinin “Bir kəmər, bir yol” layihəsinə alternativ hesab edilən “Qlobal Gateway” təşəbbüsü müsbət nəticələr verir.

Polise.az  BBC telekanalına istinadla xəbər verir ki, bu barədə Brüsseldə keçirilən iki günlük “Qlobal Gateway” forumunun açılışında çıxış edən Avropa Komissiyasının Prezidenti Ursula Fon der Lyayen bildirib. Onun sözlərinə görə, son illər müəyyən uğursuzluqla nəticələnən qlobal layihələrdən fərqli olaraq, bu təşəbbüs istiqamətində irəliləyiş davam edəcək.

Avropa Komissiyasının Prezidenti İsrail və HƏMAS arasında mövcud münaqişə, Rusiyanın Ukraynaya qarşı müharibəsi, iqlim böhranı və pandemiyadan sonrakı bərpanı dünyanın hazırda üzləşdiyi aktual problemlər kimi xarakterizə edərək deyib: “İndiki və gələcək nəsillərin taleyi əvvəlkindən daha yüksək keyfiyyətdən asılıdır və hamımızı birləşdirən infrastrukturun əhatə dairəsi durmadan genişlənməlidir”.

Ursula Fon der Lyayen 2021-2027-ci illər arasında təmiz infrastrukturun maliyyələşdirilməsi və qurulması üçün 300 milyard avro sərmayənin səfərbər edilməsini hədəfləyən plan haqqında deyib: “Avropa komandası indiyə qədər Avropanın ən böyük qlobal investisiya proqramını irəli sürdü. Heç bir ölkə öz əsas infrastrukturunu maliyyələşdirməyin yeganə variantının gələcəyini satmaq olduğu bir vəziyyətlə üzləşməməlidir. Biz bilirik ki, təhlükəsizliyimiz bütün ölkələrdəki sülh və sabitlikdən asılıdır. İqtisadiyyatlarınız böyüdükdə və çiçəklənəndə rəqabət qabiliyyətimiz artır. Dostlarımız da daha möhkəm olduqda dayanıqlılığımız daha güclü olur. Buna görə də Avropa tərəfdaşlarımızla daha sıx əməkdaşlığı seçdi. “Qlobal Gateway” layihəsini işə saldığımızdan iki il sonra biz müsbət nəticələri görürük”.

Avropa Komissiyasının Prezidenti Aİ-nin artıq transformativ layihələrə 66 milyard avro ayırdığını qeyd edərək, bunun demək olar ki, yarısının “geri qaytarılması lazım olmayan” qrantlar olduğunu vurğulayıb. O əlavə edib: “Hələ görüləsi çox işlər var, lakin biz artıq deyə bilərik ki, bu gün “Qlobal Gateway” inkişafa yol açır.

Təşəbbüsün iqlim dəyişikliyi aspektinə gəldikdə, Ursula Fon der Lyayen onun inkişaf etməkdə olan ölkələrin “iqlim dəyişikliyinin həlledici hissəsi” ola biləcəyini vurğulayıb.

Polise.az