“New York Post” ermənipərəst senator Menendes və onun erməni arvadının maliyyə fırıldaqları barədə yazı dərc edib

“New York Post” nəşri ermənipərəst senator Bob Menendesin və arvadı Nadine Arslanyanın qaranlıq maliyyə fəaliyyətini ifşa edən araşdırma yayıb.

APA-nın xəbərinə görə, nəşr yazır ki, ABŞ senatoru Bob Menendezin arvadı, erməni əsilli Nadine Arslanyan cəmi üç il əvvəl ciddi maliyyə çətinlikləri ilə üzləşdiyi halda, ötən il 400.000 dollar dəyərində qızıl külçələr satıb.

Qızılı külçələrin satışı keçən yaz, onun həyat yoldaşı senator Bob Menendesin yeni federal araşdırma ilə üzləşdiyini açıq şəkildə etiraf etməsindən aylar əvvəl baş tutub.

Senatorun illik maliyyə gəliri ilə bağlı açıqlamalarına əsasən, 56 yaşlı Nadine Arslanyan qızılı 7 aprel 2022-ci il və 16 iyun 2022-ci il tarixləri arasında satıb. Bu, 13 funt xalis qızıla bərabərdir.

Satış 2020-ci ildə Menendeslə evlənməzdən əvvəl maliyyə cəhətdən çətinlik çəkən, hətta evini girov qoymaq məcburiyyətində qaldığı bildirilən Nadine Arslanyan üçün irimiqyaslı qazanc olub.

Cütlük hazırda münasibətlərinin rəsmiləşməsindən bir neçə ay sonra Federal Təhqiqatlar Bürosunun başlatdığı araşdırmasının mərkəzindədir.

Məlumatlara görə, Manhetten federal prokurorları senatorun və ya onun həyat yoldaşının “siyasi lütflər” müqabilində avtomobil və Vaşinqtonda mənzil də daxil olmaqla açıqlanmayan lüks hədiyyələr alıb-almadığını araşdırırlar.

Artıq ikinci dəfədir ki, korrupsiya iddialarına görə federal orqanlar senator Menendeslə bağlı təhqiqat aparır. İlk istintaq işi Nyu Cersi ştatında uzun müddət aparılıb və 2011-ci ildə heç bir ittiham irəli sürülmədən başa çatıb.

69 yaşlı Menendesin işi 2015-ci ildə Ədliyyə Departamentinin İctimai Dürüstlük Şöbəsinin prokurorları tərəfindən yenidən araşdırılıb, çünki Menendes siyasi xeyriyyəçi doktor Salomon Melgendən külli miqdarda rüşvət almaqda ittiham edilib.

İddialar arasında senatorun öz komandasının üzvlərinə Melgenin Braziliya, Ukrayna və Dominikan Respublikasından olan qız dostları üçün viza almağa göstəriş verməsi də var.

Qeyd edək ki, ermənipərəst senator Bob Menendezin adı zaman-zaman korrupsiya və maliyyə qalmaqallarında hallanıb. Erməni diasporundan aldığı külli miqdarda çirkli pullar qarşılığında ermənilərin əsassız iddialarını hər imkanda və müstəvidə gündəmə gətirən senator rüşvət və korrupsiya cinayətlərində təqsirli bilinib.

“New York Post”un bu yazısında toxunduğu məsələ ilə bağlı “Assoşieyted Press“ 2015-ci ildə yazırdı ki, ABŞ-ın Nyu Cersi ştatından seçilən senator Bob Menendesə qarşı korrupsiya ittihamı irəli sürülüb.

Menendes tanışı, Demokrat Partiyasının donoru, həkim oftalmoloq Salomon Melgenə kömək etmək üçün vəzifə səlahiyyətlərindən su-istifadə etməkdə şübhəli bilinir. Ədliyyə Nazirliyində iddia edirlər ki, bu “xidmətlər”ə görə Menendez müntəzəm olaraq bahalı bəxşişlər, o cümlədən, heç bir ödəniş etmədən hava nəqliyyatından istifadə imkanı əldə edib.

Ümumilikdə, Menendesə qarşı 14 bənd üzrə, o cümlədən korrupsiyada və bir neçə növ qəsdən dələduzluqda, dövlət vəzifəsini icra edərkən “vəzifəsinin şəxsi maraqlarına uyğun gəlməməsi” faktını gizlətməkdə ittiham irəli sürülüb.

Qatı ermənipərəstliyi ilə tanınan, erməni diasporu tərəfindən satın alınmış Menendesin müxtəlif qeyri-qanuni əməllərdə günahlandırıldığı barədə bu ilin mayında “New York Times” da məlumat yaymışdı. Qəzet yazırdı ki, Federal prokurorluq və Federal Təhqiqatlar Bürosu ermənipərəst amerikalı senator Robert Menendesin və ya həyat yoldaşı Nadine Arslanyanın Vaşinqtonda halal ət şirkətindən lüks avtomobil və mənzil hədiyyələri alıb-almadığını araşdırır.

Prokurorlarla görüşən vəkilin dediyinə görə, Nyu Cersi ştatından senator olan Demokratlar Partiyasının təmsilçisi Menendeslə bağlı aparılan istintaq ət şirkətinin ofislərində və şirkətin prezidentinin evində hökumətin axtarışı ilə bağlıdır.

Korrupsiya və digər maliyyəti cinayətində adı hallanan ermənipərəst senator və konqresmenlərin siyahısı genişdir.

Menendeslə yanaşı, ABŞ Konqresində erməni lobbisinin qatı müdafiəçisi olan Frank Pellone, Adam Şiff, Robert Dold, Bred Şerman, eləcə də senator Barbara Bokser və digərlərinin adı zaman-zaman maliyyə fırıldaqlarında, korrupsiya əməllərində, erməni diasporunun müxtəlif fondlarında topalanmış maliyyə vəsaitlərinin mənimsənilməsində hallanıb.

Bu şəxslərin məhz erməni diasporundan aldığı maliyyə qarşılığında Azərbaycan və Türkiyə əleyhinə fəaliyyətlə məşğul olduğu sirr deyil.

Əlavə edək ki, Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev “New York Post” nəşrində senator Bob Menendes və həyat yoldaşı haqqında dərc olunmuş məqaləyə münasibət bildirib.

H. Hacıyev “X” (“Twitter“) hesabında məqalədən çıxarış paylaşaraq ermənipərəst siyasətçilərin fəaliyyətinin ətraflı araşdırılmasının vacibliyini qeyd edib.

“Pul hər şeyi həll edir! ABŞ və Avropadakı bütün anti-Azərbaycan ermənipərəst lobbiçilər və siyasətçilər daha da araşdırılmalıdır”, – deyə Prezidentin köməkçisi vurğulayıb.

Polise.az