Putin və Şoyqunu müharibədən sonra bu aqibət gözləyir
“Ukrayna Silahlı Qüvvələrinin və Ukrayna xalqının müqaviməti göstərdi ki, müharibə Rusiyanın məğlubiyyəti ilə başa çatacaq. Ukrayna da dövlətimizə qarşı hərbi cinayəti həyata keçirənləri cəzalandırmaq üçün xüsusi cinayət tribunalının yaradılması ideyasını dəstəkləyib”.
Modern.az xəbər verir ki, bunu Rusiya-Ukrayna müharibəsinin 100-cü günündə Ukraynanın BMT-dəki daimi nümayəndəliyinin müşaviri Sergey Dvornik Təhlükəsizlik Şurasının açıq debatında səsləndirib.
“Belə bir tribunal Putin, Şoyqu, Gerasimov, Lavrov və digər Rusiya hərbi cinayətkarları üçün müharibənin yekun akkordu olacaq. Ukrayna Silahlı Qüvvələrinin və bütün Ukrayna xalqının 100 günlük cəsarətli müqavimətindən sonra aydındır ki, bu təxribatsız və əsassız təcavüzkar müharibə Rusiyanın məğlubiyyəti ilə başa çatacaq. Bütün sivil dünyanın qələbəsinə çevriləcək məğlubiyyət”, – Sergey Dvornik vurğulayıb.
Onun sözlərinə görə, Rusiya ordusunun geri çəkilməsindən sonra Kiyev vilayətində 1200 mülki vətəndaşın cəsədi tapılıb. Eyni zamanda, Mariupolda əhali arasında itkilərin sayını yalnız şəhər işğaldan azad edildikdən sonra hesablamaq olar. Sergey Dvornik Mariupolda on minlərlə insanın öldürüldüyü qeyd edib.
O, həmçinin vurğulayıb ki, Ukraynada hər gün 200-300-ə yaxın hərbi cinayət törədilir və işğalın əvvəlindən onların ümumi sayı 15 mini ötüb.
Eyni zamanda, işğal zamanı uşaqlara qarşı törədilmiş 1042 cinayət işi qeydə alınıb – azı 261 uşaq öldürülüb, 460 nəfər yaralanıb, 145 nəfər itkin düşüb. Bundan əlavə, uşaqlara qarşı zorakılıqda şübhəli bilinən 11 rus işğalçısının şəxsiyyəti artıq müəyyən edilib.
Dvornik qeyd edib ki, Rusiya ukraynalı uşaqları qaçıraraq öz ərazisinə aparır.
“İşğalçıların məqsədi təkcə Ukraynanı tutmaq deyil, həm də Ukrayna millətini məhv etməkdir. Ümumilikdə 230 mindən çox uşaq Rusiya Federasiyasının ərazisinə deportasiya edilib”.
