94 yaşlı yəhudi xanım vəkil Fələstinə dəstəyinə görə terror ittihamı ilə həbs olundu – “Aylardır buna çalışırdım…”

Böyük Britaniyanın Liverpul şəhərində keçirilən etiraz aksiyası zamanı hüquq müdafiəçisi, 94 yaşlı yəhudi əsilli barrister (ali dərəcəli vəkil) Marqaret Ouen (Margaret Owen) polis tərəfindən saxlanılıb.

Polise.az xəbər verir ki, bu barədə “Əl-Cəzirə” (Al Jazeera) telekanalının yaydığı məlumatda bəhs edilir.

Məlumata görə, yaşlı qadının həbsinə səbəb onun Fələstinə dəstək nümayişində Böyük Britaniyada rəsmən qadağan olunmuş “Palestine Action” təşkilatını müdafiə edən plakat qaldırması olub.

“Middle East Eye” və digər Qərb media qurumlarının məlumatına görə, rəsmi London 2025-ci ilin iyul ayında Terrorizm Aktı çərçivəsində “Palestine Action” birbaşa fəaliyyət qrupunu terror təşkilatları siyahısına daxil edib. Bu səbəbdən Böyük Britaniya qanunvericiliyinə görə, həmin qrupa açıq dəstək nümayiş etdirmək birbaşa cinayət tərkibi yaradır.

Merseysayd polisinin Qərb mətbuatına verdiyi açıqlamada bildirilir ki, Leyboristlər Partiyasının konfransı qarşısında keçirilən həmin aksiyada eyni ittihamla (terror qrupuna aid rəmzlər və ya şüarlar daşımaq şübhəsi ilə) 82 nəfər etirazçı həbs edilib. Hadisə şahidlərinin və yerli fəalların bildirdiyinə görə nümayişdə saxlanılanların əksəriyyəti yaşlı insanlardan və təqaüdçülərdən ibarət olub…

Həbsindən sonra mətbuata danışan 94 yaşlı yəhudi barrister Marqaret Ouen qanunların absurdluğunu ifşa etmək üçün bu addımı bilərəkdən atdığını gizlətməyib:

“Mən aylardır ki, həbs olunmağa çalışırdım. Evimin pəncərəsinə də bu şüarı yapışdırmışdım. Hesab edirəm ki, peşəkar hüquqşünasların bu cür vətəndaş itaətsizliyi aksiyalarında iştirakı hərəkata müəyyən bir hüquqi və mənəvi avtoritet qazandırır. Biz hökumətdən İsrailə silah satışını tamamilə dayandırmağı və bu absurd qadağanı ləğv etməyi tələb edirik…”

İsrail yönümlü və bəzi mühafizəkar Qərb mənbələrində, həmçinin sosial şəbəkələrin İsrail seqmentində isə 94 yaşlı vəkilin hərəkəti kəskin tənqid olunub. İsrailli şərhçilər və bəzi media fəalları onu “həqiqətdən qopmuş və radikal qrupların təbliğatına aldanmış yəhudi” adlandıraraq, polisin qanunun aliliyini qorumasını və terrora dəstək verən hər kəsə (yaşından asılı olmayaraq) eyni hüquqi prosedur tətbiq etməsini tamamilə doğru addım kimi qiymətləndiriblər.

Qeyd edək ki, “Palestine Action” qrupu Böyük Britaniyada İsrailin ən böyük silah istehsalçısı olan “Elbit Systems” şirkətinin zavodlarına və ofislərinə qarşı təşkil etdiyi radikal basqınlar və birbaşa etiraz aksiyaları ilə tanınır. Hazırda qrupun bir neçə üzvü Britaniya həbsxanalarında terror ittihamı ilə cəza çəkir…

Britaniya ictimaiyyətində və hüquq müdafiəçiləri arasında bu hadisə çox böyük rezonans və ciddi etiraz dalğası yaradıb. 94 yaşlı nüfuzlu bir vəkilin terror ittihamı ilə həbsi ölkədə ifadə azadlığı və etiraz hüququ ətrafında gedən mübahisələri daha da alovlandırıb.
Britaniya cəmiyyətindəki əsas reaksiyaları və etiraz formalarını aşağıdakı qruplara bölmək olar:

Məhkəmə müstəqilliyini və münsiflər heyətinin hüquqlarını müdafiə edən “Defend Our Juries” kimi hüquq müdafiə təşkilatları hökuməti sərt tənqid ediblər. Təşkilat rəsmiləri bəyan ediblər ki, hökumətin sülhməramlı nümayişçiləri, müəllimləri, səhiyyə işçilərini və təqaüdçüləri terrorçu elan edib həbsxanaya atması “məntiqsiz, qeyri-dayanıqlı və qeyri-əxlaqidir”. Onlar qadağanın dərhal ləğv edilməsini tələb edirlər…

Aksiya zamanı və həbslər dalğası başladıqdan sonra ətrafdakı Britaniya vətəndaşları polisin hərəkətlərinə kəskin reaksiya göstəriblər.

• Şahidlərin reaksiyası:

Hadisə şahidləri və gənc fəallar polisin yaşlı insanları, xüsusən də Marqaret Oueni sülhməramlı şəkildə plakat saxladığı üçün polis maşınlarına mindirməsini “iyrənc və utancverici” adlandırıblar.

• Kütləvi həbsə meydan oxumaq:

Bu aksiya əslində elə bir növ kütləvi vətəndaş itaətsizliyi idi. Yüzlərlə britaniyalı təqaüdçü, veteran və fəal, qanunun “absurdluğunu” sübut etmək üçün bilərəkdən eyni şüarı qaldıraraq həbs olunmağa növbəyə durublar…

Məşhur britaniyalı jurnalist və solçu siyasi şərhçi Ouen Cons və digər tanınmış media nümayəndələri mövcud hökuməti ölkədə “Corc Oruell yaradıcılığına bənzər bir kabus rejimi” bərqərar etməkdə ittiham ediblər. Onlar vurğulayırlar ki, London polisi belə real cinayətkarlarla mübarizə aparmaq əvəzinə, ömrünü insan hüquqlarına həsr etmiş 94 yaşlı yəhudi qadını terrorçu kimi saxlayır…

Sosial mediada və yerli müzakirələrdə hökumətə səs verən bir çox solçu və mərkəzçi Britaniya vətəndaşı dərin məyusluq ifadə edir. İnsanlar hökumətin Qəzzada baş verənlərə qarşı sadəcə bəyanat verməklə kifayətləndiyini, lakin real olaraq İsrailə silah ötürməyə davam etdiyini və daxildə sülh tərəfdarlarını susdurduğunu bildirərək etiraz edirlər…

Polise.az